Bomambo bakakundiwa ndi Mushe
1 Ibaba ndibo bomambo be shango bakakundiwa ne Baiziraela bakabatapila ntuthu we ku bhezhuba kwe Jorodani kudwa pa nkuku we Arinoni kunoti ku Dombo le Hemoni beyenda tjose benoti ku bhezhuba kwe Araba. 2 Mambo Sihoni we N'amori, iye wakabusa mu Heshibhoni. Wakabusa kudwa mu Aroeri imu tjekelo dze nkuku we Arinoni ne kudwa pakati kwe nkuku kunoti ku gwizi gwe Jabhoki, eyenda tjose enoti ku n'gathu we Baamoni ne gwamu le Giliyadi 3 ne nzi we Araba kunoti ku gungwa le Khinereti kunoti ku bhezhuba kwe Araba, Gungwa le Mwenyu ne kuyendila ku Bhetijeshimoti ne ku burwa kwakatathila kwe Pisiga.
4 Ogi mambo we Bhashani, mmwe we malimbelimbe e Barefayi wakabe egala ku Ashitaroti neku Edireyi. 5 Wakabusa kutangisa pa Dombo le Hemoni ne Saleka ne Bhashani kunoti ku n'gathu we Bageshuri ne Bamaakati ne gwamu le Giliyadi kunoti ku n'gathu wa Sihoni mambo we Heshibhoni.
6 Bakakundiwa ndi Mushe nlanda wa Yahwe ne Baiziraela. Mushe katola shango yabo kaipa Barubheni ne Bagadi ne gwamu le ludzi gwa Manase kuti ibe thaka yabo.
Bomambo bakakundiwa ndi Joshuwa
7 Ibaba ndibo bomambo be shango bakakundiwa ndi Joshuwa ne Baiziraela. Bakabatapila shango iku golombedzo kwe Jorodani ne kudwa pa Baligadi mu nkuku we Lebanoni kuyendila ku Dombo le Halaki lakawala lakalinga ku Seiri. Joshuwa kapa Baiziraela nge njudzi dzabo shango idzedzi kube thaka yabo, 8 shango ye matombo, shango yakawila neye Araba ne shango inotathila neye tjilambanyika neye Negebu ne shango ye Bahiti neye Baamori neye Bakanana neye Baperizi neye Bahivi neye Bajebusi.
9 Bamwe ba bomambo bakakundiwa ndi aba: Mambo we Jerikho ne mambo we nzi we Ai wakabapa ne nzi we Bhetele 10 ne mambo we Jerusalema ne mambo we Heburoni 11 ne mambo we Jarimuti ne mambo we Lakhishi ne 12 mambo we Egiloni ne mambo we Gezeri 13 ne mambo we Dibiri ne mambo we Gederi 14 ne mambo we Horima ne mambo we Aradi 15 ne mambo we Libina ne mambo we Adulamu 16 ne mambo we Makeda ne mambo we Bhetele 17 ne mambo we Tapuwa ne mambo we Heferi 18 ne mambo we Afeki ne mambo we Lasharoni 19 ne mambo we Madoni ne mambo we Hazori 20 ne mambo we Shimironimeroni ne mambo we Akishafa 21 ne mambo we Taanaki ne mambo we Megido 22 ne mambo we Kedeshi ne mambo we Jokineyamu mu Karimeli 23 ne mambo we Dori mu Dori ku bunandzwa ne mambo we Goyimu mu Giligala 24 ne mambo we Tireza. Bomambo bose bakabe bali makumi matatu ana nng'ompela (31).
© Kalanga Bible © Bible Society of Botswana, 2008, 2018.