Kobiwa kwe shango ku bunandzwa kwe Jorodani
1 Edzi ndidzo shango dzakakobegwa Baiziraela kube thaka yabo mu shango ye Kanana, bedzikobegwa ne mpirisiti Eleazari na Joshuwa nkololo wa Nuni ne batungamili be misha ye njudzi dze Izirael. 2 Thaka yabo bakaipiwa ngeku posa hakata koga Yahwe sekwa bakabudza Mushe ngekwe njudzi dzili zhanalume dzina gwamu. 3 Mushe wakakobela njudzi mbili dzina gwamu shango kube thaka bhezhuba kwe Jorodani koga Balevi ibo kasibakobele shango kuti ibe thaka yabo. 4 Bakololo ba Josefa bakabe bazwithubukanya babe njudzi mbili gwa Manase ne gwa Ifureimi koga Balevi abazokobegwa shango kube thaka kuzhe kwe mizi yabanga gala koga ina mafulilo e zwithuwo zwabo. 5 Baiziraela bakathubukanya shango koga Yahwe sekwa bakabudza Mushe.
Heburoni inopiwa Khalebu
6 Kwakati limwe zhuba Balume be ludzi gwa Juda bakazha kuna Joshuwa ali ku Giligala. Ipapo Khalebu nkololo wa Jefune we N'kenizi kadwa Joshuwa kati, “Unoziba atenti kuti tjibaka tja Mushe tjaakabe ali ku Kadeshibhareneya Yahwe bakadwa Mushe nlume we Ndzimu betini nge kuko ne kwangu? 7 Ndakabe ndili makole ali makumi manna anditung'wa ndi Mushe nlanda wa Yahwe kudwa mu Kadeshibhareneya kuti ndiyende kushola shango iyeyi ye Kanana. Ngono ndakazha ndikambikila nge malebeswa tjandakabona. 8 Koga bandakabe ndayenda nabo bakatema bathu mafupa. Koga imi atobela Yahwe Ndzimu wangu nge moyo wangu wose. 9 Ndizo mu zhuba ilelo Mushe katuna kundili kati, ‘Tjoselele shango yawakatshamba mavu ayo, ndowokupa iyo ikabe thaka iyo nenge bana babo nge kusingapele, ngoti watobela Yahwe Ndzimu wangu nge moyo uwo wose.’ 10 Ndizo ngwenu, bona koga Yahwe sekwa bakagadzabgwe, nditjatjila nasi, ndatjibe makole ali makumi manna ana mashanu (45) kudwa mu tjibaka Yahwe tjabakagadzabgwe ikoku Mushe, tjibaka tje Baiziraela tjabakabe batjayenda bali mu tjilambanyika. Ndimi nasi, ndipano ndabe ne makole mangapa makumi ali zhanakadzi ana ali mashanu (85). 11 Nditjakasima koga sekwa ndakabe ndili iko tjibaka tjandakatumwa ndi Mushe, na ngwenu nditjina simba le kugwa koga sa ntolo. 12 Ngono ngwenu undipe shango iyeyi ye matombo yandakagadziwabgwe ndi Yahwe zhuba ilelije. Wakazwihwigwa nge zebe dzidzo kuti bathu be Anakimu bayapo, bana mizi mikulu ina matizhilo akasima, pamwe swiyo Yahwe bangandibhatsha abatatila kutjena koga Yahwe sekwa bakaleba.”
13 Ngono Joshuwa kakombolela Khalebu nkololo wa Jefune ngono kampa nzi we Heburoni kuti ibe thaka iye. 14 Ndizo Heburoni ikabe ya Khalebu kudwa tjose zhuba ilelo ngekuti wakagalabgwe muna Yahwe Ndzimu we Iziraela nge moyo uwe wose. 15 Heburoni yakati isathu yapiwa Khalebu yakabe idang'wa Kiriyatiaribha, Abha iwoyo wakabe ali nlume nkulu kulu mu bathu be Baanakimu. Ngono kudwapo shango ye Heburoni ikagala nge kunyalala.
© Kalanga Bible © Bible Society of Botswana, 2008, 2018.