Mizi ye Balevi
1 Misholo ye misha ye Balevi, bakazha kuna Eleazari we mpirisiti na Joshuwa nkololo wa Nuni ne misholo ye misha ye njudzi dze Iziraela, 2 bali ku Shilo mu shango ye Kanana beti, “Yahwe bakapa Mushe ndaulo ye kuti mutipe mizi yatingagala muili kakale ina mafulilo e zwithuwo zwedu.” 3 Ndizo sekwakaleba Yahwe, Baiziraela bakapa Balevi mizi iyeyi sahwoku:
4 Hakata dzakati dzilobgwa dziba le kutanga likawila ludzi gwa Kohati nsha nge nsha. Balevi bakabe bali zwizekugwana zwa Aroni we mpirisiti zwakapiwa mizi ili gumi lina mitatu (13) kudwa mu mizi ye ludzi gwa Juda ne muna gwa Simiyoni ne muna gwa Bhenjamini. 5 Bakohati bakabe basala bakapiwa mizi ili gumi kudwa mu ludzi gwa Ifureimi ne gwa Dani ne mu gwamu le ludzi gwa Manase. 6 Zwizekugwana zwa Geshoni zwakapiwa mizi ili gumi lina mitatu kudwa mu ludzi gwa Isakari ne gwa Asheri ne gwa Nafutali ne mu gwamu le ludzi gwa Manase mu Bhashani.
7 Zwizekugwana zwa Merari nsha ne nsha izo zwakapiwa mizi ili gumi lina mibili kudwa mu ludzi gwa Rubheni ne gwa Gadi ne gwa Zebuluni.
8 Ndizo Baiziraela bakapa Balevi mizi iyeyi ne mafulilo iyawa, koga Yahwe sekwa bakabe babudza Mushe. 9 Kudwa mu ludzi gwa Juda ne gwa Simiyoni bakabapa mizi ye mazina iyawa, 10 yakapiwa zwizekugwana zwa Aroni zwakabe zwili zwe ludzi gwa Kohati gwe Balevi ngono dziba le hakata likawila izo kutanga. 11 Bakapiwa nzi we Kiriyatiaribha unodang'wa Heburoni, (Abha wakabe ali tate ba Anakimu) ne mafulilo akaupoteleka mu shango ye matombo ya Juda. 12 Khalebu nkololo wa Jefune wakapiwa minda ye mizi ne mizana yakapoteleka kuti ibe thaka iye. 13 Ndizo zwizekugwana zwa Aroni we mpirisiti zwakapiwa Heburoni, nzi we matizhilo e babulayi ne Libina ne 14 Jatiri ne Eshitemoa ne 15 Holoni ne Dibiri ne 16 Ayini ne Jutha ne Bhetishemeshi yose yose yakashangana ne mafulilo ayo yakabe ili zhanalume (9) kudwa mu njudzi idzedzi mbili. 17 Kudwa mu ludzi gwa Bhenjamini bakabapa nzi we Gibiyoni newe Geba newe 18 Anatoti newe Alimoni kose ne mafulilo ayo, yose yose yakashangana yakabe ili mizi ili minna. 19 Mizi yose ye bapirisiti ne zwizekugwana zwa Aroni yakabe ili gumi lina mitatu yakashangana ne mafulilo ayo. 20 Bakohati be nsha we Balevi bakabe basala bakapiwa mizi mu ludzi gwa Ifureimi. 21 Ibo bakapiwa nzi we Shekemu (nzi we matizhilo e wabulaya abe asakazwimisila bulaya) ne mafulilo awo mu shango ye matombo ye Ifureimi ne Gezeri ne mafulilo awo, 22 ne Kibizayimu ne Bhetihoroni, yose yose yakashangana ne mafulilo awo yakabe ili mizi ili minna. 23 Kudwa mu ludzi gwa Dani bakapiwa nzi we Eliteke ne we Gibethoni newe 24 Aijaloni newe Gatirimoni yose yose yakashangana ne mafulilo ayo yakabe ili mizi ili minna. 25 Kudwa mu gwamu le ludzi gwa Manase bakapiwa nzi we Taanaki newe Gatirimoni, yose yose yakashangana ne mafulilo ayo yakabe ili mibili. 26 Mizi iyeyi ili gumi yakashangana ne mafulilo ayo yakapiwa be nsha we Kohati bakabe basala. 27 Be nsha mmwe we Balevi, banodang'wa Bagerishoni ibo bakapiwa kudwa mu gwamu le nsha wa Manase nzi we Golani mu Bhashani (nzi we matizhilo e wakabulaya abe asakazwimisila bulaya) newe Bheeshitera, yose yose yakashangana ne mafulilo ayo yakabe ili mizi mibili 28 Kudwa mu ludzi gwa Isakari bakapiwa mizi ye Kishiyoni ne Daberati ne 29 Jarimuti ne Eniganimu, yose yose yakashangana ne mafulilo ayo yakabe ili mizi ili minna. 30 Kudwa mu ludzi gwa Asheri bakapiwa Mishali ne Abidoni ne 31 Helikati ne Rehobi, yose yose yakashangana ne mafulilo ayo yakabe ili mizi ili minna. 32 Kudwa mu ludzi gwa Nafutali bakapiwa Kedeshi mu Galili (nzi we matizhilo ewabulaya asina mazwimisilo ekubulaya) ne Hamotidori ne Karitani, yose yose yakashangana ne mafulilo ayo yakabe ili mizi ili mitatu. 33 Mizi yose ye nsha we Bagerishoni yakabe ili gumi lina mitatu yakashangana ne mafulilo ayo. 34 Balevi bakabe basala bali be nsha wa Merari bakapiwa kudwa mu ludzi gwa Zebuluni bakapiwa Jokineyamu ne Karita ne 35 Dimina ne Nahalali, yose yose yakashangana ne mafulilo ayo yakabe ili mizi ili minna. 36 Kudwa mu ludzi gwa Rubheni bakapiwa Bhezera ne Jahazi ne 37 Kedemoti ne Mefaati, yose yose yakashangana ne mafulilo ayo yakabe ili mizi ili minna. 38 Kudwa mu ludzi gwa Gadi bakapiwa Ramoti mu Giliyadi (nzi we matizhilo ewabulaya asina mazwimisilo ekubulaya) ne Mahanayimi ne 39 Heshibhoni ne Jazeri, yose yose yakashangana ne mafulilo ayo yakabe ili mizi ili minna. 40 Mizi yose yakapiwa misha ya Merari bakabe bali Balevi basala, yakabe ili gumi lina mibili.
41 Mizi yose ye Balevi yakabe ili mu ntuthu we bathu be Iziraela yakabe ili makumi manna ana ili zhanakadzi (48) yakashangana ne mafulilo ayo. 42 Nzi mmwe ne mmwe wakabe una mafulilo awo akaupoteleka, kwakabe kwakajalo nge nzi mmwe ne mmwe we mizi iyeyi.
Iziraela inotola shango
43 Ndizo Yahwe bakapa bathu be Iziraela shango koga sekwa bakabe bagadzabgwe bobatategulu babo ngono ndizo Baiziraela bakatola shango bakagalako. 44 Yahwe bakapa Iziraela mbakiso mu mbizho dzose koga sekwa bakagadzabgwe bobatategulu babo. Akuna ndodwa ne ung'ompela we zwita zwabo wakama mbeli kwabo, Yahwe bakaba bhatsha kuti bakunde. 45 Yahwe bakagadzabgwe bathu be Iziraela kuti banobathamila bubuya ngono kose bakakushingikadza.
© Kalanga Bible © Bible Society of Botswana, 2008, 2018.