Matama e kutanga
1 Banji bakazwipa kukwala mbiko ye zwithu zwakashingikala pakati kwedu, 2 koga sekwa takazwibudziwa ndi ibabo bakabe balipo kutanga, bali batendeki kakale bali bashingili be dama le Ndzimu. 3 Ndizo se imi ndakashakisisa nge njele tjimwe ne tjimwe kudwa mukutangisa, ndawana kwakandilulwamila kuti ndimukukwalile ndebo yakatambunuka, imwi tate Teofilo, 4 kuti ndizo muzibe malebeswa ngekwe zwithu zwamakadiyiwa.
Kulebegwa mbeli kwe kuzwagwa kwa Johani we N'dubiki
5 Mu misi ya Herode mambo we Judiya, kwakabe kuna mpirisiti edang'wa kuyi Zakhariya, ali mmwe we goko la Abhiya, ngono wakabe ana nkadzi zina lile lili Elizabeta ali mmwe we zwizekugwana zwa Aroni. 6 Bubili gwabo, bakabe bali balulwami mu mesho e Ndzimu, basina nlandu belondolodza milayo ya She yose, ne ndaulo dzidze. 7 Koga bakabe basina bana ngobe Elizabeta wakabe asingathame bana, kakale bakabe bakwegula bose bubili.
8 Ndizo kukati kuli zolo le goko la Zakhariya kubhata nshingo we bupirisiti se kwaakabe ali mpirisiti we Ndzimu, 9 kashalugwa nge hakata kuyendidzana ne tjilenje tje bupirisiti kungina mu Ng'umba ye Ndzimu She ne kupisa motsha. 10 Mu tjibaka itjetjo tje kupisa motsha, gubungano le bathu lakabe litembezela kuzhe.
11 Ipapo ntumwa wa She kazwilakidza kunli, ali mile ku luji gwe tjibeso tje motsha. 12 Kukati Zakhariya embona, kadziyidzika kakale katja kwazo. 13 Koga ntumwa we kudzimu kati kunli, “Usitje Zakhariya, ntembezelo uwo wahwika. Nkadzi uwo Elizabeta unowokuwanila mwana we tjilisana, ngono unowon'dana uti Johani. 14 Unowobe ne kushatha ukapululudza, ne banji banowoshatha mu kuzwagwa kukwe, 15 ngobe Johani unowobe nkulu mu mesho a She. Aatowong'wa nkumbi we zhambi, kene tjimwe tjing'o tjakabila. Ngobe unowozhadziwa nge Meya yakayengemala kudwila tjose atji mu tjibumbilo tja mmeyabe. 16 Unowoshandusila bana banji be Iziraela kuna She, Ndzimu wabo. 17 Kakale unowoyenda mbeli kwa She mu meya ne mu masimba a Elija, eshandusila mimoyo ya botate ku bana babo, ne basingahwe kathama kuti bahwilile Ndzimu bayende mu butjejendu gwe balulwami, elulwamisila bathu kuzha kwa She.”
18 Ngono Zakhariya kabhuzwa ntumwa kati, “Ndingabe ne malebeswa tjini ngekwa ikoku? Ndi nthuntana ne nkadzi wangu wakwegula.”
19 Ntumwa we kudzimu kan'dabila kati, “Ndimi Gabhariyele, imi ndinoma mbeli kwe Ndzimu misi yose. Ndatumwa kulebeleka nawe ne kukubudza ndebo mbuya iyeyi. 20 Bona! Unowobe mbebebe ukasilebeleke kuswikila zhuba linowoshingikala zwithu izwezwi, ngobe auzogalamoyo matama angu anowozhadzisika nge tjibaka tjawo.”
21 Ipapo bathu bakabe bakalindila Zakhariya, ngono bakatjenamisiwa nge kunonoka kukwe mu Ng'umba ye Ndzimu. 22 Ngono kukati ebhuda, kasitubule kulebeleka nabo. Bakaziba ha abona mbono mu Ng'umba ye Ndzimu. Wakalebeleka nabo nge maboko koga asingatubule kulebeleka nge nlomo.
23 Kukati zolo lile lawila le kushinga lapela kabgwilila kanyi. 24 Shule kwe mazhuba iyawo nkadzi uwe Elizabeta kazwisenga ngono kazwisumbika mwedzi ili mishanu, 25 eti “She wandishingila ikoku mu mazhuba iyawa, wandilinga nge ngoni dzidze kandidusa shoni pakati kwe bathu.”
Kulebegwa mbeli kwe kuzwagwa kwa Jesu
26 Shule kwe mimwedzi ili mitathatu Elizabeta akazwisenga, Ndzimu wakatuma ntumwa wawo Gabhariyele ku Nazareta nzi u mu ntuthu we Galili 27 ku mwanadi wakabe akabiganyidzigwa ndobolo ne nlume wakabe eyi Josefa, we nsha wa Dafite. Zina le mwanadi iwoyo lakabe lili Mariya. 28 Ntumwa we kudzimu kayenda kunli kati, “Dumila iwe unodika kwazo, She banawe!”
29 Mariya kadziyidzika kwazo nge matama awe, ngono katjenama kuti hwudumilisa kwakatini ikoku. 30 Koga ntumwa we kudzimu kati kunli, “Usitje, Mariya, Ndzimu wakuda. 31 Unowozwisenga, ngono ukawana mwana we tjilisana, unowontumila zina uti Jesu. 32 Unowobe nkulu, kakale unowodang'wa Nkololo we Ndzimu Upezhugwi zhugwi. She Ndzimu banowompa tjigalo tje bushe gwa batategulu babe Dafite, 33 ngono unowobusa nge kusingapele mu ng'umba ya Jakubo, bushe gugwe agutowopela.”
34 Mariya kabhuzwa ntumwa we kudzimu eti, “Ikoku kowoshingikala tjini, se ndili mwanadi ndisathu aziba nlume kene?”
35 Ntumwa we kudzimu kashandula eti, “Meya yakayengemala inowozha mukuli ne masimba e Ndzimu Upezhugwi zhugwi anowobe mukuli. Ndizo mwana iwoyo waunowozwala, unowobe N'yengemali, kadang'wa kuyi Nkololo we Ndzimu. 36 Na Elizabeta gamu lilo, unowobe ne mwana nenguba akakwegula, iye wakabe ali balumbila umu mwedzi uwe we butathatu. 37 Akuna tjisingatubuke ku Ndzimu.”
38 Mariya kashandula eti, “Imi ndi nlanda wa She, ngakushingikale kundili sekwa waleba.” Ipapo ntumwa we kudzimu kansiya.
Mariya ekumba Elizabeta
39 Kukati mu mazhuba iyawo Mariya kazwilulwamisa, kalibilidza kayenda ku nzi umu ntuthu we matombo, e Judiya, 40 ngono kaswika kangina mu nzi wa Zakhariya, kadumilisa Elizabeta. 41 Ndizo kukati Elizabeta ehwa dumiliso ya Mariya, mwana katjuluka mu ntumbu uwe, Elizabeta kazhala Meya yakayengemala. 42 Kalebelekela pezhugwi kati, “Wakakombolegwa mu bakadzi bose, ndizo wakakombolegwa mwana waunowowana! 43 Koga ini kwashingikala kuti mme ba She wangu, bazhe kundili? 44 Ndati koga ndihwa udumilisa, mwana umu ntumbu wangu katjuluka nge kushatha. 45 Wakakombolegwa ngobe wakagalamoyo kuti matama awakabudziwa ndi She anoshingakala!”
Mariya kamba lumbo gwe kukudza
46 Mariya kati,
“Meya yangu inokudza She.
47 Meya yangu inoshatha ngekwe Ndzimu Ntjidzi wangu,
48 ngobe wayitila hanya butukununu gwe nlandakadzi uwe.
Kudwa nasi zwizekugwana zose zondidana wakakombolegwa,
49 ngobe Ndzimu Masimbawose wandishingila zwikulu.
Zina lawo lakayengemala.
50 Unohwila zogwadza ibabo banoutja, banouteta
kudwa mu tjizekugwana kunoti mu tjizekugwana.
51 Wakathama zwikulu nge luboko gwawo;
Ukapaladza ibabo banozwikudza, mumimoyo yabo.
52 Wakadelusa boshe mu zwigalo zwabo zwe bushe.
Koga ukamilidzila pezhugwi ibabo batukununu.
53 Wakagutsha bana zhala nge zwithu zwakanaka,
koga bafumi kabashandusa bakalembedza maboko.
54 Wakabhatsha nlanda uwe Iziraela,
ukumbulukigwa mahwilo zogwadza,
55 sekwa wakalebeleka na botate bedu, bo Abhurahama
ne zwizekugwana zwabo nge kusingapele kose.”
56 Mariya kagala na Elizabeta kungabe mimwedzi mitatu, kudwapo kabgwilila kanyi.
Kuzwagwa kwa Johani we N'dubiki
57 Kwakati tjibaka tjatjizha tje kuti Elizabeta awane mwana, katshibama mwana we tjilisana. 58 Ngono babakidzani naye ne makamu awe bakahwa kuti She wakanhwila ngoni kukulu, bakashatha naye.
59 Ndizo mu zhuba le buzhanakadzi (8) bakazha kuwothumbila mwana, bakabe bewontumila beti Zakhariya, zina la tate babe. 60 Koga mmeyabe bakalebeleka beti, “Akutowojalo, unowodang'wa kuyi Johani.”
61 Bakati kunli, “Akuna mmwe pakati kwe makamu awo una zina ilelo.” 62 Ndizo bakalebeleka nge maboko na tate babe, beshako ziba kuti ibo tate be mwana banoda kuntumila beti ani.
63 Zakhariya kakumbila bgwe linokwaligwa, ngono kakaabadza mmwe ne mmwe ngokwala eti, “Zina lile ndi Johani.” 64 Tjinyolotjo kazhula nlomo ne lulimi gugwe gukasununguka, katangisa kulebeleka, elumbidza Ndzimu. 65 Babakidzani naye bakatjenama kwazo ne mu ntuthu wose we matombo we Judiya, bathu bakabe belebeleka ngekwe zwithu izwezwi zose. 66 Mmwe ne mmwe wakahwa ikoku ezwibhuzwisisa eti, “Mwana iwoyu ini tjaanowobe itjo ngono?” Ngobe simba la She lakabe lilimunli.
Lumbo gwa Zakhariya
67 Tate ba Johani, Zakhariya bakazhala Meya yakayengemala, ngono bakalebelambeli beti,
68 “Gudzo ngalibe muna She, Ndzimu we Iziraela,
ngobe wazha ku bathu bawo ukabadzutunula.
69 Watizhisila Ntjidzi una masimba
unodwa mu ng'umba ye nlanda uwe Dafite.
70 Sekwa wakaleba nge balebesambeli bawo
bakayengemala kudwa ntolo,
71 kuti takafanila tjidziwa mu zwita zwedu,
ne mu maboko abose bakatibenga.
72 Wakathama ikoku kulakidza mahwilo zogwadza
akagadziwabgwe bobatategulu bedu,
ne kukumbula tjidumano tjawo tjakayengemala,
73 ne kutuna kwawakatuna kuna tate bedu Abhurahama,
74 kutisunungula mu maboko e zwita zwedu,
kuti titubule kushingila She tisingatje tjimwe
75 mu kuyengemala ne kululwama mbeli kukwe,
mu butjilo gwedu gose.
76 Nawe mwanangu, unowodang'wa
nlebesambeli we Ndzimu Upezhugwi zhugwi,
ngobe unowoyenda mbeli kwa She kunlulwamisila zila
77 kupa bathu ba She zibo ye kuti jidzo lozha
nge kuzwiibhatigwa kwe zwibi zwabo,
78 nge mahwilo zogwadza e Ndzimu
kowopenya tjedza mutili tjidwa zhuzhugwi.
79 Kupa tjedza ibabo
bagele mu zhalima ne bamu ntutshi we lufu,
kutitungamilila mu zila ye kunyalala.”
80 Ngono mwana kakula kasima mu meya, ndizo kagala mu tjilambanyika kudzina eboneka patjena ku Iziraela.
© Kalanga Bible © Bible Society of Botswana, 2008, 2018.