Kumuka kwa Jesu mu bafi
(Matewu 28:1-10Mako 16:1-8Johani 20:1-10)
1 Kukati mu zhuba le kutanga mu tshipi, kutji mangwanana kwazo, bakadzi ibabo bakatola motsha wabakabe balulwamisa, bakayenda ku ikumbu. 2 Bakawana bgwe lakabe lakazhalila nkoba we ikumbu lakakunguludzigwa kutjena ne ikumbu, 3 koga bakati bengina mukati, bakasiwane itumbu. 4 Bakati batjakakaabala ngekwa ikoku, balume babili bakaambala zwiambalo zwinopenya bakama pejo nabo. 5 Ngotja kwabo, bakakotamisa misholo pasi, ipapo balume ibabo bakati ku bali, “Ini mushaka ntjili mu bafi? 6 Aapo ipapa wamuka. Kumbulani sekwa akamubudza, atji mu Galili eti, 7 ‘Nkololo we Nthu wakafanila alongwe mu maboko e batjinyi, abambugwe, koga mu zhuba le butatu amuke.’ ”
8 Ipapo bakakumbula matama awe. 9 Ngono bakati beshanduka bedwa ku ikumbu, bakabudza bali gumi lina ung'ompela ne bamwe bose ikoku kose. 10 Kwakabe kuli Mariya we Magadala na Joanna na Mariya mme ba Jakubo ne bamwe bakabe banabo, bakabudza batumwa ba Jesu ikoku. 11 Koga bakasidume tjinolebgwa nge bakadzi ibabo, ngobe bekumbula kuti banoleba mazhambgwala. 12 Koga Pita kamilika kalabukila ku ikumbu, kukati eshozhela, kabona matyila ali woga, ndizo kabgwilila akakaabadziwa nge tjashingikala.
Kuyenda ku Emausi
(Mako 16:12-13)13 Zhuba ilelo zwalo bamwe babili be badiyiwa bakabe beyenda ku nzi unoyi Emausi, thambo ingabe khilomitha dzili gumi kudwa ku Jerusalema. 14 Bakabe bezuwa ngekwe zwithu zose izwezwi zwakabe zwashingikala. 15 Bakati batjazuwa belebeleka ngekwe zwithu izwezwi, Jesu nge kukwe kazha, kabhatana zila nabo. 16 Koga bakayitiwa kuti basinzibe. 17 Kababhuzwa kati, “Moyenda muzuwa ngekweni kene?”
Bakama belingika bakafubala. 18 Mmwe wabo unoyi Kileopasi kambhuzwa kati, “Apa ndiwe woga mwezi mu Jerusalema usingazibe zwithu zwakashingikala mazhuba iyawa kene?”
19 Kabhuzwa kati, “Zwithu zwipi?”
Bakadabila beti, “Ngekwa Jesu we Nazareta. Wakabe ali nlebesambeli, ana masimba makulu mu matama nenge mu mishingo mbeli kwe Ndzimu ne bathu bose. 20 Bapirisiti bakulu ne balauli bedu bakan'yisa ku nlayo kuti asumikilisigwe lufu abambugwe. 21 Koga takabe tigalabgwe kuti ndiye unowosunungula Iziraela. Nasi i zhuba le butatu zwithu zose izwezwi zwakashingikala. 22 Pezhugwi kwa ikoku, bamwe bakadzi be goko ledu batitjenamisa. Bayenda ku ikumbu nasi kutji mangwanana kwazo, 23 koga bakasiwane itumbu tjitje. Bashanduka bakatidwa bakati babona mbono ye batumwa be kudzimu beti, unotjila. 24 Bamwe be bakabe banaswi bakayenda ku ikumbu, bakawana kuli se kwaleba bakadzi ibabo, koga iye bakasimbone.”
25 Kati ku bali, “zwilengwe ndimwi, mononoka seni kugalamoyo tjakalebgwa nge balebesambeli! 26 Apa kwakabe kusakafanila kuti Mesiya adziyidzike nge zwithu izwezwi, kuti ekongina mu gudzo lile kene?” 27 Kakale katangisa kubatjenesela tjakalebgwa nge kukwe mu hwalo dzose dze Ndzimu, kutangisa mu hwalo dza Mushe ne hwalo dzose dze balebesambeli bose.
28 Ndizo kukati besedzela ku nzi wabakabe beyenda kuuli Jesu kayedza se unopindila mbeli. 29 Koga bakankumbila beti, “Gala naswi, ngobe kwabe madekwana zhuba lamila.” Ndizo kangina kagala nabo. 30 Ngono kati eja nabo katola tjiwunga, katjiyengemadza, katjipemula, kabapa itjo. 31 Ipapo mesho abo kazhuka, ndizo bakanziba, koga kamila mu mesho abo. 32 Bakabhuzwana beti, “Apa mimoyo yedu yabe isingapise mutili elebeleka naswi mu zila etitjenesela hwalo dze Ndzimu kene?”
33 Bakamilika tjinyolotjo bakabgwilila ku Jerusalema. Ikoko bakawana bali gumi lina ng'ompela bakakubungana ne bamwe badiyiwa 34 ngono ibabo bakati, “Ku malebeswa! She bamuka, bazwilakidza kuna Simoni.”
35 Ipapo balume ibabo babili bakaleba tjashingikala mu zila ne sekwa banziba ndiko epemula tjiwunga.
Jesu ezwilakidza ku badiyiwa babe
(Matewu 28:16-20Mako 16:14-18Johani 20:19-23Mishingo 1:6-8)36 Kukati batjalebeleka ngekwa ikoku, Jesu nge kukwe kama pakati kwabo, kati ku bali, “Mbakiso ngaibe namwi.”
37 Koga Bakapaluka moyo, kakale bakatja bekumbula kuti banobona ipuku. 38 Jesu kati ku bali, “Ini mudziyidzika? Ini muna kududumwa mu mimoyo yenyu kene? 39 Bonani maboko angu ne makumbo angu. Ndimi nge kwangu! Mundibhate mubone, ngobe ipuku atjina nyama ne mafupa, sekwa munobona imi ndinazo.”
40 Kati aleba ikoku kabalakidza maboko awe nenge makumbo awe. 41 Kwakati batjakashatha kukulu bakatjenama, kakale basingadume tjabanobona kababhuzwa kati, “Muna tjinojiwa pano kene?” 42 Bakampa thango ye hwobe yakagotjiwa, 43 ngono kaitola kaija bakanlinga.
44 Kati ku bali, “Etji nditjo tjandakamubudza nditji namwi nditi, zwithu zose zwakakwagwa nge kwangu mu nlayo wa Mushe ne mu hwalo dze balebesambeli ne mu lukwalo gwe Njimbo azwizofanila kuwila pasi.”
45 Ipapo kazhula mimoyo yabo kuti bahwisise hwalo dze Ndzimu. 46 Kabadwa kati, “Nditjo tjakakwagwa kuyi, Mesiya unowodziyila, kamuka mu bafi nge zhuba le butatu, 47 nenge kuti kushandukila matjinyo kwe bathu neku bazwiibhatigwa matjinyo, kowosumikigwa nge zina lile ku zwitjaba zose, kutangisa mu Jerusalema. 48 Imwi mu batendeki be zwithu izwezwi. 49 Ndowomuzhisila tjamakagadziwabgwe ndi Tate bangu, koga galani mu nzi nkulu kudzina mupiwa simba linodwa pezhugwi.”
Jesu etolegwa pezhugwi kudzimu
(Mako 16:19-20Mishingo 1:9-11)50 Ipapo kabatungamila kanoti ku Bhetani, kamilidza maboko kabakombolela. 51 Kukati atjabakombolela, kabasiya ngono katolegwa kudzimu. 52 Ipapo bakan'namata ngono bakabgwilila ku Jerusalema bakashatha kwazo. 53 Ngono bakagala bali mu Ng'umba ye Ndzimu bekudza Ndzimu.
© Kalanga Bible © Bible Society of Botswana, 2008, 2018.