Kushanduka mbumbiko
(Mako 9:2-13Luke 9:28-36)1 Shule kwe mazhuba matathatu, Jesu katola Pita na Jakubo na Johani nnung'una wa Jakubo kabatungamila kayenda nabo pezhugwi kwe dombo lefu lefu, pasina nthu. 2 Ikoko kashanduka mbumbiko mbeli kwabo. Buso gugwe gukapenya se zhuba ngono zwiambalo zwizwe zwikabe zwitjena se tjedza. 3 Ipapo koga kukaboneka mbeli kwabo, Mushe na Elija belebeleka na Jesu. 4 Pita kati kuna Jesu, “She kubuyanana kuti tibe tili pano. Ha muda ndowobaka mishasha mitatu ipapa, mmwe uli wenyu, mmwe uli wa Mushe, ngono mmwe uli wa Elija.”
5 Kati atjalebeleka, gole linopenya likabafukidza, ngono hwi likabhuda mu gole liti, “Oyu ndiye Nkololo wangu unodika, ndoshatha kwazo nge kukwe. Munhwilile!”
6 Badiyiwa bakati behwa ikoku, bakathigama bakakotamisa misholo ngotetema. 7 Koga Jesu kazha kababhata kati, “Milikani, musitje.” 8 Bakati bemilidza mesho bakashaya wababona kuzhe kwa Jesu ega.
9 Bakati bedeluka mu dombo, Jesu kabadwa eti, “Kushete wamabudza tjamabona kudzina iye Nkololo we Nthu emusiwa mu bafi.”
10 Badiyiwa bakambhuzwa beti, “Ini ngono badiyi be nlayo beti Elija wakafanilo zha kutanga?”
11 Jesu kadabila eti, “Tjose, Elija unozha kutanga, ngono unowolulwamisa zwithu zose. 12 Koga ndomubudza nditi, Elija wakazha kale koga bathu abazonziba, bakathama tjimwe ne tjimwe tjabada munli. Nkololo we Nthu na iyebo unowodziyila ali mu maboko abo.”
13 Ipapo badiyiwa bakahwisisa kuti wabe elebeleka nabo ngekwa Johani we N'dubiki.
Jesu unopodza mbisana we zwifafa
(Mako 9:14-29Luke 9:37-43a)14 Bakati beswika pa mbunga we bathu, mmwe nlume kazha kuna Jesu ngono kathigama mbeli kukwe kati, 15 “She, hwilani nkololo wangu ngoni. Una zwifafa, ngono unodziyila kwazo kwazo. Kanjinji unowila mu moto kakale kanjinji kawila mu vula. 16 Ndakanzhisa ku badiyiwa benyu koga bakakong'wa kumpodza.”
17 Jesu kashandula eti, “Bathu bangwenu basingagalemoyo kakale bakakombama ndimwi, ndowobe namwi tjibaka tjingapani kene? Ndowobe ne moyonlefu nge kwenyu tjibaka tjingapani? Unzhise ngeno kundili.” 18 Jesu katjemela meya mbi, ngono ukabhuda munli ndizo mbisana kapola ipapo tjinyolotjo.
19 Ipapo badiyiwa bakazha kuna Jesu bali boga, bakambhuzwa beti, “Ini iswi takong'wa kuudusa?”
20 Kadabila eti, “Ngobe muna kugalamoyo kutukununu. Ndolebesa nditi, ha muna kugalamoyo kungapa shanga tukununu ye lusaba, mungati ku dombo ileli, ‘Idwa ipapa uyende apaje,’ ngono lowodwa. Akuna tjinowomukona.”
Jesu unoleba kakale ngekwe lufu gugwe
(Mako 9:30-32; Luke 9:43b-45)22 Kukati bekubungana mu Galili, Jesu kati ku bali, “Nkololo we Nthu unowobhakhwa kalongwa mu maboko e bathu. 23 Banowombulaya, koga mu zhuba le butatu unowomusiwa.”
Ngono badiyiwa bakazhala buyendasi.
Lukhetho gwe Ng'umba ye Ndzimu
24 Kukati Jesu ne badiyiwa babe baswika mu Kapenaume, baamutjili be lukhetho gwe Ng'umba ye Ndzimu bakayenda kuna Pita bakabhuzwa beti, “Apa n'diyi wenyu unolipa lukhetho gwe Ng'umba ye Ndzimu kene?”
25 Kadabila eti, “Ee, unogulipa.”
Kukati Pita engina mu ng'umba, Jesu kalebeleka naye kutanga eti, “Unobona tjini Simoni? Bomambo be shango banotola lukhetho muna ani? Banogutola mu bathu babo kene mu bazhi?”
26 Pita kadabila eti, “Mu bazhi.”
Jesu kan'dwa kati, “Ngono kodwa kuti bathu babo bakasununguka. 27 Koga kuti tisibagwadzise moyo, yenda ku gungwa uposele hwuka iyo mu vula. Utole hwobe yawabhata kutanga, unowoti uzhula nlomo wayo unowowana mari akaswika kulipila imi nawe, uatole ubape.”
© Kalanga Bible © Bible Society of Botswana, 2008, 2018.