Tjifaniso tje bashingi mu nnda we mizhambi
1 “Bushe gwe kudzimu gofanana ne mweni we nnda wakabhuda mangwanana kunopa bathu nshingo kushinga mu nnda uwe we mizhambi. 2 Kadumana nabo kubalipa mari e zhuba ling'ompela, ndizo kabayisa ku nnda uwe we mizhambi. 3 Kati ebhuda mangwanana zhuba latatha kabona bamwe bathu bali mile pa matengeselo basingashinge tjimwe, 4 kabadwa kati, ‘Namwibo yendani munoshinga mu nnda wangu we mizhambi, ngono ndowomulipa kwakafanila.’ Ndizo bakayenda. 5 Kabhuda kakale masikati ne mu matewuko kayita sa ikoko. 6 Kukati madekwana kabhuda kanowana bamwe kakale bali mile koga. Kababhuzwa kati, ‘Ini mashwa muli mile ipapa zhuba lose musina tjamunoshinga kene?’ 7 Bakanshandula beti, ‘Akuna watipa nshingo.’ Kati ku bali, ‘Namwibo yendani munoshinga mu nnda wangu we mizhambi.’
8 “Kukati zhuba limila, mweni we nnda we mizhambi kati ku nshingisi uwe, ‘Dana bashingi ubape mibhayilo yabo, utange nge be bupelo kudzina kunoti kuna be kutanga.’ 9 Bashingi bazha madekwana bakazha, ngono mmwe ne mmwe wabo kaamutjila mari e zhuba ling'ompela. 10 Ndizo kukati be kutanga bezha bakakumbula kuti banowoamutjila kunji. Koga mmwe ne mmwe wabo kaamutjila mari e zhuba ling'ompelabo. 11 Bakati beaamutjila, bakang'ong'ola ku mweni we nnda, 12 bakati, ‘Balume ibaba be bupelo bashinga tjibaka tjifupi, ngono wabalizanya koga naswi, iswi tashwa tilemegwa nge nshingo kakale titshwa nge zhuba.’
13 “Koga kadabila mmwe wabo eti, ‘Nzwalani, anditokutjebela. Apa auzodumana nami kushingila mari e zhuba ling'ompela kene? 14 Tola mbhayilo uwo uyende. Ndada kupa ibaba be bupelo sekwa ndapa iwe. 15 Apa andina fanilo ye kushinga tjandada nge mari angu kene? Ini una ndandala, imi ndishaka kuyita buthu?’ ”
16 Jesu kati, “Ndizo be bupelo banowobe be kutanga ne be kutanga bakabe be bupelo.”
Jesu unoleba gwe butatu ngekwe lufu gugwe
(Mako 10:32-34Luke 18:31-34)
17 Ngwenu Jesu kati etathila ku Jerusalema kadanila ntome badiyiwa babe bali gumi lina babili, ngono kati ku bali, 18 “Bonani, totathila ku Jerusalema, kunowoti Nkololo we Nthu kayisiwa mbeli kwe bapirisiti bakulu ne badiyi be nlayo, kwabanowontilika nlandu kuti abulawe, 19 ngono banowonsa kuna Bezwitjaba kudadigwa ne kulobgwa nge rwabha ne kubambugwa ngono unowomusiwa mu zhuba le butatu.”
Kukumbila kwa mme
(Mako 10:35-45)20 Ipapo mme be bakololo ba Zebhedi bakazha kuna Jesu ne bakololo babo, ngono bakathigama bakankumbila tjimwe.
21 Kababhuzwa kati, “Ini tjamunoshaka?”
Mme be bakololo ba Zebhedi bakati, “Ndokumbila kuti bakololo bangu babili ibaba bagale mmwe ku luboko gugo gwe luji, mmwe kuna gwe lumeshwe mu bushe gugo.”
22 Jesu kati ku bali, “Amutoziba tjamunokumbila. Apa mungatubula kung'wa nkombe wandinowong'wa kene?”
Bakati kunli, “Tingatubula.”
23 Jesu kati ku bali, “Mowong'wa nkombe wangu koga kugala ku luboko gwangu gwe luji kene ku luboko gwangu gwe lumeshwe ate kuli kwangu kukukoba, koga ngekwa ibabo bakwakabigigwa ndi Tate bangu.”
24 Ngono kukati bamwe badiyiwa bali gumi behwa ikoku bakagwadzilamoyo bakololo ba Zebhedi ibabo babili. 25 Jesu kabadanila kunli, ngono kati ku bali, “Moziba kuti boshe be zwitjaba banobusa bathu babo nge kubadziyidza, ngono balauli ibabo banobalaula nge masimba. 26 Koga ngakusijalo mu muli. Ha kuli kuti kuna mmwe unoshaka kube nkulu pa bamwe mu muli, ngaabe nlanda wenyu, 27 na iyebo unoshaka kube mbeli, ngaabe iye nlanda wenyu. 28 Ngobe na iye Nkololo we Nthu aazozha kuwoshingigwa koga wakazha kuwoshingila ne kupa butjilo gugwe kudzitunula banji.”
Jesu unopodza mapofu mabili
(Mako 10:46-52Luke 18:35-43)29 Ngono kukati Jesu ne badiyiwa babe bebhuda mu Jerikho mbunga we bathu nkulu ukabatobela, 30 mapofu e balume babili bakabe bali gele pa hwunde ye zila, ngono bakati behwa kuti Jesu unopinda ipapo bakamimila beti, “Nkololo wa Dafite utihwile ngoni!”
31 Mbunga we bathu ukabatjemela ukabadwa kuti banyalale, koga bakamimila kwazo beti “She mutihwile ngoni, Nkololo wa Dafite!”
32 Jesu kama kabadana kababhuzwa kati, “Moshaka kuti ndimuyitileni?”
33 Bakashandula beti, “She, toshaka kuti mesho edu azhuke.”
34 Jesu kabahwila zogwadza, ngono kabhata mesho abo. Tjinyolotjo bakapofunuka, ngono bakantobela.
© Kalanga Bible © Bible Society of Botswana, 2008, 2018.