Jesu unongina mu Jerusalema nge mipululu
(Matewu 21:1-11Luke 19:28-40Johani 12:12-19)1 Bakati babe pejo ne Jerusalema, beswika mu Bhetifage ne Bhetani pa Dombo le Mitoba, Jesu katuma badiyiwa babe bali babili. 2 Kabadwa kati, “Yendani mungine mu nzi iwoyu wamakalingisana nawo, mowoti tjinyolotjo mungina muuli mukawana donkana isina wakatongo itatha, muisunungule muizhise. 3 Ha kuli kuti kuna ungamudwa eti, ‘Ini muthama muijali?’ mun'dwe muti, ‘She banoyishaka, banowoibuza tjinyolotjo.’ ”
4 Bakayenda bakanowana donkana yakasungigwa pa nkoba pejo ne zila. Bakasunungula donkana iyeyo. 5 Koga ibabo bakabe bali mile ipapo bakabadwa bakati, “Moyitani, mosunungulilani donkana iyeyi kene?”
6 Bakababudza sekwa leba Jesu. Ndizo bakabaletja bakayenda. 7 Bakazhisa donkana kuna Jesu. Bakawala hazu dzabo pezhugwi kwe donkana, ngono Jesu kaitatha. 8 Koga banji bakawala hazu dzabo mu zila, bamwe bakawala thabi dzina mazhani manjinji dzabakakwaula ku shango. 9 Kukati bose bakabe bali mbeli kene shule kwa Jesu bakapululudza beti, “Hosana! Wakakombolegwa unozha nge zina la She. 10 Kwakakombolegwa bushe gwa tate bedu Dafite, gunozha! Hosana, Ndzimu Upezhugwi zhugwi.”
11 Jesu kangina mu Jerusalema, ndizo kanongina mu Ng'umba ye Ndzimu, ngono kati alinga tjimwe ne tjimwe, se tjibaka tjakabe tjayenda, kabhuda kayenda ne bali gumi lina babili ku Bhetani.
Jesu unolonga nkuyu bhiso
(Matewu 21:18-19)12 Kwakati tjimuka bedwa ku Bhetani, Jesu kabhakhwa nge zhala. 13 Kabona mpaya uli thambgwana wakathinila, kayenda kunobona kuti kene ungawana tjimwe muuli. Kati eswika pauli kasiwane tjimwe, ha kusi mazhani koga, nge kuti kwakabe kusathu kukabe tjibaka tje makuyu. 14 Ngono kaudwa kati, “Kushaye unowoja mitjelo inodwa mukuli kakale.” Badiyiwa babe bakahwa.
Jesu unoyenda ku Ng'umba ye Ndzimu
(Matewu 21:12-17Luke 19:45-48Johani 2:13-22)
15 Ndizo bakaswika mu Jerusalema, Jesu kangina mu Ng'umba ye Ndzimu, katata bakabe betengesa ne bakabe betenga mu Ng'umba ye Ndzimu. Kapitula tafuli dze bakabe betenganya mari ne bakabe betengesa ngurukuku. 16 Kukasibe ne waanodumila kupalama Ng'umba ye Ndzimu akasenga thundu. 17 Ngono kadiya, ebadwa eti, “Apa akuzokwagwa kuyi, ‘Ng'umba yangu inowodang'wa Ng'umba ye Ntembezelo ye njudzi dzose kene?’ Koga imwi makaithama guwu le mbava.”
18 Bapirisiti bakulu ne badiyi be nlayo bakahwa, ngono bakashaka zila yabanganlobesa ndiyo, ngobe bakabe bentja, nge kuti bathu bose bakabe betjenamisiwa nge zwidiyo zwizwe.
19 Kukati kwabe madekwana, bakabhuda mu nzi nkulu.
Tjidiyo tje mpaya
(Matewu 21:20-22)20 Bakati bepinda mangwanana, bakabona mpaya wakalongwa bhiso ndi Jesu wakawoma kunoti ku midzi. 21 Pita kaalakana, ngono kadwa Jesu kati, “N'diyi, bonani, mpaya wamakalonga bhiso wakawoma.”
22 Jesu kabadabila eti, “Galanimoyo mu Ndzimu. 23 Ndolebesa ndoti kumuli, iye unowodwa dombo ileli eti, ‘Simuka uwile mu gungwa,’ asingadudumwe mu moyo uwe, egalamoyo kuti tjaanoleba tjowoshingikala, unowotjithamigwa. 24 Ndizo wali ndomubudza nditi, tjimwe ne tjimwe tjaunokumbila nge ntembezelo, ugalemoyo kuti watjiamutjila, ngono tjowobe tjitjo. 25 Kakale uti ha uma utembezela, uzwiibhatigwe bana milandu nawe, ndizo tate babo ba kudzimu banowokuzwiibhatigwabo milandu iyo.” [26 Koga ha usingazwiibhatigwe bamwe, tate babo ba kudzimu abatowokuzwiibhatigwa milandu iyo.]
Bhuzo ngekwe ndaulo ya Jesu
(Matewu 21:23-27Luke 20:1-8)27 Bakazha kakale ku Jerusalema, Jesu kati atjayenda mu Ng'umba ye Ndzimu, bapirisiti bakulu ne badiyi be nlayo ne bakulu be Bajuta bakazha kunli, 28 bakan'dwa bakati, “Unoshinga zwithu izwezwi nge simba lipi? Ndiani wakakudumila kuti uzwishinge?”
29 Jesu kabadwa kati, “Ndowomubhuzwa bhuzo ing'ompela, mundidabile, ngono ndowomubudza kuti i simba lipi landinothama zwithu izwezwi ndilo. 30 Kudubika kwa Johani kwakabe kudwa kudzimu kene ku bathu? Mundidabile.”
31 Ngono bakakangazhana tje kwabo, “Ha tingati, ‘Kwakadwa kudzimu,’ unowoti ‘Ini ngono musakan'galamoyo?’ 32 Koga ha tingati, ‘Kwakadwa mu bathu…’ ” Bakabe betja bathu, nge kuti mmwe ne mmwe wakabe eziba kuti Johani nlebesambeli we malebeswa. 33 Ndizo bakashandula Jesu beti, “Atitoziba.”
Jesu kabadwa kati, “Namibo andingamubudze kuti ndoshinga zwithu izwezwi nge ndaulo ipi.”
© Kalanga Bible © Bible Society of Botswana, 2008, 2018.