Mbalo 21 - Kalanga Bible (KBTP)

Kukundiwa kwe Bakanana

1 Kukati mambo we Aradi we N'kanana wakabe egala ku burwa ehwa kuti Baiziraela banozha nge zila ye Atharimu, kagwa ne Iziraela katapa bamwe babo. 2 Ngono Baiziraela bakatuna kuna Yahwe beti, “Tjoselele ha mungalonga bathu ibaba mu maboko edu, towokolomodza mizi yabo mikulu.” 3 Ngono Yahwe bakateedza Baiziraela, bakalonga Bakanana mu maboko abo, Baiziraela bakakolomodza mizi mikulu ye Bakanana, pathu ipapo pakadang'wa kuyi Horima.

Nyoka yakathamwa nge phangula

4 Bakati bebhuda mu Dombo le Hori bakayenda nge zila ye Gungwa Shaba kuti bapoteleke Edomu. Koga bathu bakanyala moyo batji mu zila. 5 Ngono Bathu bakang'ong'ola ngekwe Ndzimu na Mushe beti, “Apa ini makatidusa ku shango ye Egipiti towofila mu tjilambanyika itjetji, pasina zojiwa kene vula? Tatjinyala nge zojiwa izwezwi zwisi zwe tjimwe!” 6 Ipapo Yahwe bakatumila nyoka dzina bushungu gunobulaya ku bathu, dzikaluma bathu, ndizo Baiziraela banjinji bakafa. 7 Bathu bakazha kuna Mushe bakandwa bakati, “Takatjinya, ngobe takang'ong'ola kuna Yahwe nawe, tembezela kuna Yahwe baduse nyoka pakati kwedu.” Ndizo Mushe katembezelela bathu. 8 Ngono Yahwe bakadwa Mushe bakati, “Thama nyoka ye phangula, ube uitilika mu bhango, ngono mmwe ne mmwe unowobe alumwa, ailinge unowopola.” 9 Mushe kathama nyoka nge phangula kaitilika mu bhango, ngono ha nyoka yaluma nthu, unowobe elinga ku nyoka ye phangula ebe epola.

Kudwa mu Dombo le Hori kunoti ku nkuku we Moabu

10 Bathu be Iziraela bakamilika bakanokotokela ku Oboti. 11 Bakamilika bedwa mu Oboti, bakanokotokela ku Iyeabarimu, mu tjilambanyika ku bhezhuba kwe ntuthu we Moabu. 12 Kudwa ipapo bakamilika, bakanokotokela mu nkuku we Zeredi. 13 Kudwa ipapo baka milika, bakanokotokela seli kwe gwizi gwe Arinoni. Mu tjilambanyika tjinoabilila ku n'gathu we ntuthu we Baamori, ngoti Arinoni n'gathu we Moabu, upakati kwe Moabu ne Arinoni. 14 Ndizo kwakalebgwa nge kwako mu Lukwalo gwa Yahwe gwe Ngwa kuyi,

“Wahebe mu Sufa,

ne mikuku ye Arinoni,

15 ne nkungulukila we mikuku

unoabilila ku bugalo gwe Ari,

yakasupha ne n'gathu we Moabu.”

16 Kudwa ipapo bakadwilila bakanoti ku Bheeri, ku tshime lakadwiwa Mushe ndi Yahwe beti, “Kubunganya bathu bose, ndowobapa vula.” 17 Ndizo Iziraela kamba lumbo igogu eti,

“Tshime dwilila vula iyo,

Ngono towoidumilisa nge lumbo:

18 Tshime lakatshiwa nge makulukota,

Lakatshiwa nge batungamili be bathu,

Litshiwa nge ludozo gwe bushe

Belitsha nge wombo dzabo.”

Bakamilika mu tjilambanyika bakanoti ku Matana. 19 Ngono kudwa ipapo bakayenda ku Nahaliele, kudwa ku Nahaliele bakayenda ku Bhamoti. 20 Kudwa mu Bhamoti bakayenda kunoti ku nkuku umu ntuthu we Moabu, unotathila pezhugwi kwe Dombo le Pisiga lakakotamila ku tjilambanyika.

Kukundiwa kwa bomambo Sihoni na Ogi

(Matama 2:26—3:11)

21 Ipapo Baiziraela bakatuma batumwa kuna Mambo Sihoni we Baamori kunon'dwa beti, 22 “Tokumbila palama shango yenyu. Ngono atitowobhuda mu zila, kene kuli kupalama minda ye mizhambi, nenguba kuli kung'wa vula mu matshime enyu. Towotobela zila inopalama shango ya mambo. Atitowobhudila ku luji, kene ku lumeshwe, kudzina tinobhuda mu ntuthu wenyu.” 23 Koga Sihoni kasitongo dumila Iziraela kupalama shango iye. Kakubunganya babhayani babe bose, kabhudila ku tjilambanyika, kanoswika ku Jahazi, kabhayana ne Iziraela. 24 Koga Iziraela ikababulaya nge thumo, ikatola shango yabo kudwa mu Arinoni kunoti ku Jabhoki, bukule gunonoti ku Baamoni ngoti Jazeri wakabe uli n'gathu we Baamoni wakabe wakasima. 25 Iziraela ikatapa mizi mikulu yose, ikagala mu mizi mikulu yose ye Baamori, kose ne mu Heshibhoni ne mizana yose yakaipoteleka. 26 Heshibhoni wakabe uli iwo nzi nkulu wa Mambo Sihoni we Baamori. Ndiye wakagwa na mambo we kutanga we Moabu kantapila shango iye yose kunoti ku gwizi gwe Arinoni. 27 Ndizo ntetembeli eko tetembela eti,

“Izhani ku Heshibhoni, nzi nkulu ngaubakiwe,

Nzi wa Sihoni ngaupundumale.

28 Ngoti moto wakapisa udwa mu Heshibhoni,

nthuto wakamilika udwa mu nzi nkulu wa Sihoni.

Wakalobesa Ari we Moabu,

ne matombo e Arinoni,

botetshi be misholo ye matombo e Arinoni.

29 Yee mme wee! Wapalala iwe Moabu!

Mafa, imwi bathu be Khemoshi!

Wakathama bakololo babe batizhi,

ne bakololokadzi babe batapiwa

ba Sihoni, mambo we Baamori.

30 Bakafa ne bana babo kudwa ku Heshibhoni

kunoti ku Diboni,

moto wakapisa ukadza ukanoti Medeba.”

31 Ipapo Iziraela kabaka mu shango ye Baamori. 32 Mushe katuma shodzi kunoshola shango ye Jazeri. Ngono bakatapa mizi yayo, bakatata Baamori bakabe bali ko. 33 Ipapo Baiziraela bakashanduka nge zila inoyenda ku Bhashani. Ngono Mambo Ogi we Bhashani ne bathu babe bose bakabhuda bakanogwa nabo ku Edireyi. 34 Koga Yahwe bakadwa Mushe bakati, “Usintje, ngoti ndowonlonga mu maboko awo, kose ne bathu babe bose ne shango iye. Unowonthama tjawakathama Sihoni mambo we Baamori wakabe ebusa ku Heshibhoni.” 35 Baiziraela bakabulaya Ogi ne bakololo babe, kose ne bathu babe bose, kudzina kunosala kusina nenge limbelimbe ling'ompela lasala. Ngono bakatapa shango iye.