Mbalo 32 - Kalanga Bible (KBTP)

Njudzi dziku bhezhuba kwe gwizi gwe Jorodani

1 Ipapo bakololo ba Rubheni ne bakololo ba Gadi bakabe bana zwithuwo zwinjinji. Ngono bakabona kuti shango ye Jazeri neye Giliyadi yakanakila zwithuwo. 2 Ndizo bakololo ba Gadi ne bakololo ba Rubheni bakayenda kuna Mushe na Eleazari mpirisiti ne batungamili be gubungano bakabadwa bakati, 3 “Ataroti ne Diboni ne Jazeri ne Nimera ne Heshibhoni ne Elealeya ne Sebamu ne Nebo ne Bheoni, 4 shango yakatapiwa mbeli kwe gubungano le bathu be Iziraela nge bhatsho ya Yahwe yakanakila zwithuwo. Ngono balanda benyu bana zwithuwo.” 5 Ngono bakati, “Apa mutihwila ngoni, ipani balanda benyu shango iyeyi kube yedu, musitongo batjuludzila seli kwe gwizi gwe Jorodani.”

6 Mushe kashandula bakololo ba Gadi ne bakololo ba Rubheni eti, “Apa bana ba tate benyu banowoyenda ku ngwa imwi musala ipapa kene? 7 Ini mushaka nyadza moyo bathu be Iziraela kuti basitjulukile seli kwe gwizi gwe Jorodani kunongina mu shango yabakapiwa ndi Yahwe kene? 8 Nditjo tjakathamwa ndi botate benyu, pandakabatuma bedwa mu Kadeshibhareneya kunoshola shango. 9 Ngoti bakati bathathila ku Nkuku we Eshikholi, bakati bebona shango, bakanyadza moyo bathu be Iziraela kuti basingine mu shango yabakapiwa ndi Yahwe. 10 Ngono Yahwe bakazhala bushongola kwazo mu zhuba ilelo, ngono bakatuna beti, 11 ‘Ndolebesa nditi, akuna nthu ne nng'ompela wakadwa ku Egipiti kudwa muna bana makole ali makumi mabili kuyenda pezhugwi, unowobona shango yandakatuna nditi ndowoipa Abhurahama na Isaki na Jakubo, ngobe abazondihwilila.’ 12 Akuna ne nng'ompela kuzhe kwa Khalebu nkololo wa Jefune we N'kenizi na Joshuwa nkololo wa Nuni, ngobe bakandihwilila. 13 Yahwe bakazhala bushongola bakathama kuti Baiziraela badzungayile mu tjilambanyika kwe makole ali makumi manna (40), kudzina tjizekugwana tjakathama mbipo mbeli kwabo tjiloba. 14 Ngono bonani, namwibo moshaka yedza botate benyu, lutshinga gwe batjinyi, moshaka paphidzila Iziraela bushongola gwa Yahwe gunotjisa kakale. 15 Ngoti ha mufupatila Yahwe banowosiya bathu ibaba kakale mu tjilambanyika, ngekujalo mothama kuti bathu bose ibaba balobesiwe.”

16 Ngono bakasedzela kuna Mushe bakandwa bakati, “Towobakila zwithuwo zwedu matanga ipapa, tikabuya tikabakila bana bedu mizi mikulu. 17 Shule kwa ikoku, towotola zwibhayano tikazwilulwamisila kutungamila bathu be Iziraela kuyenda ku ngwa. Kudzina tinobakotosa ku shango yabanowogala. Ngono bana bedu banowogala mu mizi mikulu ye matizhilo, kubabakilila mu bathu be shango iyeyi. 18 Atitowobgwilila ku mizi yedu kudzina mmwe ne mmwe we bathu be Iziraela agadzikana mu bugalo gwaapiwa. 19 Ngoti iswi atinganowana bugalo nabo seli kwe gwizi gwe Jorodani, ngobe iswi takawana bugalo ku bhezhuba seli ino kwe gwizi gwe Jorodani.”

20 Ndizo Mushe kabadwa kati, “Apa kuli kuti mowothama sekwa munoleba, timbeli kwa Yahwe sangwenu, tolani zwibhayano muyende ku ngwa. 21 Mbhayani mmwe ne mmwe wenyu unowotjuluka gwizi gwe Jorodani akatungamigwa ndi Yahwe, unowogwa ne zwita zwizwe kudzina Yahwe bezwikunda. 22 Ngono mowokunda shango mbeli kwa Yahwe, mube mubuya musitjina nlandu kuna Yahwe ne mu Baiziraela. Ndizo Yahwe banowomusunungulila shango iku bhezhuba kwe Jorodani kube yenyu. 23 Koga ha musingake mukashingikadza tjamaleba, bonani, mowobe mathama tjibi mbeli kwa Yahwe. Ngono ndomubudza, mowolobgwa shamu ngekwe tjibi tjenyu. 24 Bakilani bana benyu mizi mikulu, ne pkhwizi dzenyu matanga, mube mushingikadza tjamagadzabgwe.”

25 Bakololo ba Gadi ne bakololo ba Rubheni bakadwa Mushe bakati, “Balanda benyu banowothama sekwa badwiwa ndi tetshi wabo. 26 Bana bedu ne bakadzi bedu ne zwithuwo zwedu kose kowosala ipapa mu mizi mikulu ye Giliyadi. 27 Koga balanda benyu banowotjuluka Jorodani, mbhayani mmwe ne mmwe unoyenda ku ngwa akatungamigwa ndi Yahwe sekunoleba tetshi wedu.”

28 Ndizo Mushe kapa ndaulo nge kwabo kuna Eleazari mpirisiti na Joshuwa nkololo wa Nuni ne ku batungamili be njudzi dze bathu be Iziraela. 29 Ngono Mushe kabadwa Kati, “Apa bakololo ba Gadi ne bakololo ba Rubheni bangatjuluka Jorodani bakayenda ku ngwa bali pasi kwe ndaulo ya Yahwe, ngono ha kungati nge bhatsho yabo mukakunda shango, mubape shango ye Giliyadi kube yabo. 30 Koga ha basingake bakatjuluka Jorodani bakayenda ku ngwa namwi, bapiwe shango ku Kanana, baishanganyile namwi.”

31 Ngono bakololo ba Gadi ne bakololo ba Rubheni bakashandula beti, “Yahwe sekwa baleba, towothama tiijalo. 32 Towotjuluka Jorodani tiyenda ku ngwa ku Kanana tili pasi kwe ndaulo ya Yahwe, kuti ndizo tiwane thaka yedu ipapa seli ino ku bhezhuba kwe Jorodani.”

33 Ndizo Mushe kapa bakololo ba Gadi ne bakololo ba Rubheni ne gwamu le ludzi gwa Manase nkololo wa Josefa ntuthu wose wa Mambo Sihoni we Baamori na Mambo Ogi we Bhashani, kushanganyila ne mizi mikulu ne shango yakaipoteleka. 34 Bakololo ba Gadi bakabaka maswingo e Dibhoni ne Ataroti ne Aroeri 35 ne Atirotishofani ne Jezeri ne Jogebheha 36 ne Bhetinimirahi ne Bhitiharani ne matanga e pkhwizi. 37 Ngono bakololo ba Rubheni bakabaka e Heshibhoni ne Elealehi ne Kiriathaimu 38 ne Nebo ne Bhaalemeyoni (zina ileli lakashandugwa) ne Sibhemahi. Mimwe mizi yabakabaka bakaipa mazina apoga.

39 Ludzi gwa Makiri nkololo wa Manase gukanonginililia shango ye Giliyadi gukaitola, gube gutata Baamori bakabe baligele muili. 40 Ngono Mushe kapa Makiri shango ye Giliyadi kagala muili. 41 Jairi tjizekugwana tja Manase kanotapa mizi yabo, kaidana Havojaire. 42 Nobahi kanotapa shango ye Kenati ne mizi yayo, ngono kaidana nge zina lile eti Nobahi.