1 Usiyemule bathu babiibi,
kene kuyemula kube nabo,
2 ngobe mikumbulo yabo inoluka phipiti,
ne milomo yabo inolebazwakabipa.
3 Nge butjenjedu ng'umba inobumbiwa,
nge hwisiso inothumbidziwa,
4 ne luzibo ng'umba dzi mukati dzozhadziwa,
ne thundu inoguta yakanaka.
5 Nthu wakatjenjela wakasima kupinda una matatabuko,
ne nthu una luzibo unopinda unasimba,
6 ngobe nge kukumbuludziwa nge butjenjedu ungatangisa ngwa,
ne pana bakumbuludzi banjinji kuna kunda.
7 Butjenjedu gu pezhugwi kwazo mu tjilengwe,
ku lubazhe atjitozhula nlomo watjo.
8 Iye unoluka mano e kuthama mbipo,
unowodang'wa kuyi nthami we zwibi.
9 Kuluka maano e bulengwe tjibi,
ne ndadi unoshimisa ku bathu.
10 Ha upela meya zhuba le kudziyila,
simba lilo ishomanana.
11 Sunungula ibabo banoyisiwa ku lufu;
udzibile banotshatsharikila kunobulawa.
12 Ha uti, “Bonani, tabe tisingakuzibe ikoku,”
apa iye unokala moyo aatokubona kene?
Apa iye unotjengeta meya iyo aatokuziba kene,
apa aatolipa nthu kunoyendidzana ne mishingo iye kene?
13 Nkololo wangu ija butji, ngoti gwakalulwama,
ne butji gwe mape gokuzipila.
14 Ziba kuti butjenjedu gwakajalo ku meya iyo,
ha uguwana mbhailo uyapo,
ne njemulo dzidzo adzinga kolomoke.
15 Usilalile bugalo gwe wakalulwama se nthu mbiimbi,
usitongo nginilila nzi uwe,
16 ngobe nlulwami unowa katendeka, ngono kamuka kakale,
koga bakabipa banowiswa nge mbatsha.
17 Usitongo shatha ha tjita tjiwa,
kakale moyo uwousipembele ha e kuthiwa,
18 Yahwe bakadwa bebona ngono kube kusingabashathise,
bebe beshandusa bushongola gwabo kunli.
19 Usitongo zwidziyidza ngekwe banoshinga bubi,
kakale usiyemule babi,
20 ngobe nthu mbiimbi aana mbhayilo,
luvone gwe mbiimbi gowodzimiwa
21 nkololo wangu, itja Yahwe na mambo,
kakale usishete kuhwa mmwe wabo,
22 ngobe mbatsha kudwa kubali dzingazha tjinyolotjo,
ndizo wali ndiyani unoziba mbatsha dzabanga zhisa?
23 Zwilebo ezwi naizobo nge zwe batjenjedu.
Kushalawula bathu mu kusumikilisa akuzolulwama.
24 Iye unodwa mbiimbi eti, “Auna nlandu,”
unowolongwa bhiso nge bathu, ka kashimiwa nge njudzi,
25 koga ibabo banotjemela babiibi banowobe ne shatho,
makombolelo akanaka anobawila.
26 Iye unopa shandulo yakalulwama,
unoputa milomo.
27 Lulwamisa nshingo uwo kuzhe,
lulwamisa tjimwe ne tjimwe mu nnda,
kudwapo ukobaka ng'umba iyo.
28 Usibe ntendeki ngekwe mbakidzani kusina tjimwe,
kakale usitongo tjebela nge nlomo uwo.
29 Usitongoti, “Ndowonthamila sekwa akandithamilabo,
ndowobgwilizila nthu kuyendidzana ne tjaakathama.”
30 Ndaka pinda pa nnda we simbe,
pa nnda we zhambi we usina nkumbulo,
31 wakabe una matenjana emihwa pamwe ne pamwe,
pasi kuli zhele dishwa,
ne luswingo gwawo gwe mabgwe gwakawa.
32 Ipapo abona aalakana ngekwako,
alinga aamutjila ndayo.
33 Hwope shomanana ne tshung'ayila kushomanana,
ne kufukata maboko kunyaluluka,
34 ne bushayi gowozha kukuli se ntoleli,
ne ku sheta se nlume wakasenga zwibhayano.
© Kalanga Bible © Bible Society of Botswana, 2008, 2018.