Mamwe makungulupeswa a Solomoni
1 Iyawa naiwobo makungulupeswa a Solomoni akati balume ba Hezeki'ah mambo we Juda kaayedza.
2 I gudzo le Ndzimu kusumbika zwithu,
koga gudzo la bomambo wushakisisa zwithu.
3 Se kudzimu kuli zhuzhugwi, ne shango yakangina,
saikoko mikumbulo ya bomambo ayitoshakisisika.
4 Dusa manye mu siliva,
kuti nthuli abe ne tjinobumba tjija,
5 dusila kutjena babiibi mbeli kwa mambo,
ndizo tjigalo tjitje tje bumambo tjowothumbidzigwa mu ndulamo.
6 Usitongozwikudza mu mesho a mambo,
kene ukazwibiga mu mamo e bakulu,
7 ngobe koyita kuti udwiwe kuyi, “Tathila ngeno,”
pana kuti u yisiwe pasi mbeli kwe nkololo wa mambo.
Tjawabona ne mesho awo
8 usitongo tjimbidza watjizhisa ku lubazhe,
ngobe unowothama tjini mu bupelo,
ha mbakidzani uwo ekubhatisa shoni?
9 Lebelekani ndebo yenyu ne mbakidzani uwo,
kakale musilebululane,
10 kungadwa kukati iye unomuhwa kamubhatisa shoni,
ngono kulengudzika kuko kukasipele.
11 Dama linolebgwa tjibaka tjakafanila,
lofanana ne maapuli e golide mu ndilo ye siliva.
12 Se ng'ina le golide kene ndalama ye golide
konga se ntjemeli wakatjenjela ku zebe inohwa.
13 Se kapuku tjinotothola mu tjibaka tje kuvuna
ntumwa we malebeswa kuna ibabo banontuma,
nekuti uno nayisa meya ya botetshi babe.
14 Nthu uno babgwa ne tjipo tjaasingape
unonga makole ne phepo asina vula.
15 Mbusi unotubugwa nge bana moyonlefu,
ne lulimi bunyolo govuna fupa.
16 Ha wawana butji gwe nyutji, uje kwaka ku lizana,
ngobe ungadwa ukazwimbigwa ube uthwa.
17 Usiwolobele kugala wakayenda ku nzi we mbakisani uwo,
ngobe ungadwa kanyala nge kuko ebe ekubenga.
18 Nthu unopa butendeki gwe manyepkhwa ngekwe mbakidzani uwe,
unonga swimbo kene bukanu kene nsebe unopitsha.
19 Kugalabgwe mu nthu usingagalemoyo mu tjibaka tje manikano
konga zhino lakabola kene gumbo lakalewuka.
20 Nthu unombila njimbo moyo una buyendasi
unonga nthu unombula zwiambalo mu zhuba linopota,
kene unonga vinega yadigwa mu banga.
21 Ha mbengi uwo anazhala, umpe zojiwa aje,
ne ha ananyota umpe vula ang'we,
22 kujalo unobe wabutitika masimbe anopisa mu nsholo uwe,
ndizo Yahwe banowokupa mbhayilo.
23 Phepo ye bunandzwa inozhisa vula,
ne lulimi gunonyeya gozhisa tjiso tjizhele bushongola.
24 Koyita kugala pa n'dzibo we denga le ng'umba
pana kugala mu ng'umba ne nkadzi una zhoba.
25 Thawu dzakanaka dzinodwa kulekule,
dzonga vula inotothola ku meya ina nyota.
26 Nthu lulwama unosedzela babi,
unonga dziba lina dope kene nsenya wakadzongeka.
27 Akuzonaka kuja butji bunjisa,
kene kuda kukudziwa kwazo.
28 Nthu usingatubule kuzwidziba,
unonga nzi nkulu wakanginiligwa ube usiyiwa usina luswingo.
© Kalanga Bible © Bible Society of Botswana, 2008, 2018.