Jenjedzo ngekwe bupongwe
1 Nkololo wangu, bhulutana butjenjedu gwangu,
Teya zebe uhwe kuhwisisa kwangu,
2 kutindizo ugale una njele,
ne milomo iyo itjengete luzibo.
3 Ngobe milomo ye nkadzi we bamba inodotha butji,
ne ndebo iye inosodzoloka kupinda mafuta,
4 koga mu bupelo unobaba se nshashanyama,
unopitsha se thumo linotjeka ntha dzose.
5 Makumbo awe anoyenda ku lufu,
thambo dzidze dzotobela zila inoyenda ku gomba,
6 aana hanya ne zila inoyenda ku butjilo,
zila dzidze dzakamoneleka koga ngono aatoziba nge kwako.
7 Koga ngwenu, imwi bakololo, munditeedze,
kakale musithubukane ne matama e nlomo wangu.
8 Muzanile kule kwe nkadzi wakajalo,
kakale musitongo yenda pejo ne nkoba we ng'umba iye,
9 kuti musidwe mupa bamwe gudzo lenyu,
ne makole enyu kuna bana mimoyo mikukutu,
10 kuti musidwe motolegwa masimba ne bataya
ne fumwa yenyu ingadwa ikanojiwa ne bapoga,
11 kukoti mu bupelo gwe butjilo nthu ekogomela,
nyama ne mbili zwashakala,
12 ekoti, “Ndakabe ndakabenga kulayiwa tjini,
ne moyo wangu wakalingila pasi kutjemegwa!
13 Andizo teedza hwi le badiyi bangu,
kene kuteya zebe yangu ku balayi bangu.
14 Ndakabe ndabepejo ne kuloba,
pakati kwe gubungano.”
15 Ing'wa vula mu tshime lilo,
vula inodwilila mu tshime lilo woga.
16 Apa misenya iyo ingawungila pamwe ne pamwe,
misenya ye vula mu dzizila kene?
17 Ngaibe misenya inong'wiwa nawe koga,
usinga ishanganyila ne bataya.
18 Tshime lilo ngali kombolegwe,
kakale ushathile nkadzi we buzhuzha gugo,
19 se phala hadzi yakanaka ne ngululu hadzi mbuya.
Mazhamu awe ngaakugutshe nge shatho,
ugale wakagutshiwa ne ludo gugwe.
20 Nkololo wangu, ini ungatogwa mazwiwo ne bamba wali
ube ushathisiwa nge kun'gumbatila?
21 Ngobe zila dze nthu dzimu mesho a Yahwe,
ibo banobona zila dzidze dzose.
22 Jinyo le nthu lombhatshila,
kakale unobhatshigwa mu mishingo iye ye bubi.
23 Unobulawa nge kushaya kutjemegwa,
ngekwe bulengwe gugwe bukulu wakalashika.
© Kalanga Bible © Bible Society of Botswana, 2008, 2018.