1 Apa butjenjedu aguto danilila wali,
apa kuhwisisa akutomilidza hwi lako kene?
2 Mu matuthu hwunde ne zila,
mu zijana kotola mamo ako,
3 kubapa ne mikoba inongina mu nzi nkulu,
panongingwa ndipo kodanilila kuti,
4 “Ku muli, imwi balume, ndodanilila,
ngono kudanilila kwangu kwakalingisana ne bakololo be bathu.
5 Imwi basakatjenjela, muzwidiye butjenjedu,
imwi zwilengwe, teedzani.
6 Ihwani, ngoti ndowoleba zwina mongo,
mu milomo yangu kowobhuda zwakatambunuka,
7 ngobe nlomo wangu unowoleba lebeswa,
ngobe ndo shema manyepkhwa.
8 Matama wose anodwa mu nlomo wangu akalulwama,
akuna tjimwe tjakakombama kene tjakapeyama muali.
9 Akatambunuka wose kuna unohwisisa,
kakale akalulwamila kuna banowana luzibo.
10 Amutjila kulaya kwangu pana kushaka siliva,
ne luzibo pana kushalula golide,
11 ngobe butjenjedu gopinda maseka,
ngono kose kwaungayemula kube nako akungafanidzanyiwe nago,
12 imi, butjenjedu, ndogala ne hwisiso,
kakale ndowana luzibo ne nkumbulo wakalulwama.
13 Kutja Yahwe hwubenga mbipo.
Ndoshima mazwikudzo ne kuzwida ne zila yakabipa
ne ndebo dzakaleleka.
14 Ndina mano ne butjenjedu gwakati piti,
ndina hwisiso, ndina matatabuko.
15 Bomambo ba buse ndimi,
ne babusi banothama milayo yakatambununuka,
16 ne bakololo ba bomambo banobusa ndimi,
ne makombgwa banobusa shango.
17 Ndoda ibabo banondida,
ne banondishaka kwe malebeswa banondiwana.
18 Fumwa ne gudzo zwinami,
fumwa isingapele ne dwililombeli.
19 Ntjelo wangu unopinda golide yakakuyungiwa,
ne zwizwalo zwangu zo pinda siliva.
20 Ndoyenda yenda mu zila ye ndulamo,
mu zila dze kutambunuka,
21 ndikobela fumwa ibabo banondida,
kuti bazhadze matula abo.
22 Yahwe bakandisika mu kutangisa kwe nshingo wabo,
ndili mbano ye mishingo yabo ya ntolo.
23 Ndaka bigwa ntolo ntolo,
kutanga kusathu kukasikwa shango.
24 Ndakazwagwa kusathu kukabe ne makungwa,
kusathu kukabe ne misenya inoma vula.
25 Ndakazha kusathu kukasikwa matombo
ndakabe po matuthu asathu kasikwa,
26 basathu bakasika shango ne mituthu yayo,
kene naiyo hwuluba ye kutanga ye shango.
27 Bakati besika kudzimu, ndakabe ndilipo, ha bethama makungwa,
28 pa baka simisa zhuzhugwi,
pa bakabakilila makungwa,
29 pa bakabigila gungwa n'gathu
kuti vula isitongo pindilila,
pa bakatala thiwa dze shango,
30 ipapo ndakabe ndinabo, ndili phizha,
ndibashathisa zhuba ne zhuba,
ndipembela mbeli kwabo misi yose,
31 ndipembela mu shango yabo,
kakale ndishathila bakololo be bathu.
32 Ndizo, bakololo bangu, mu ndi teedze:
bakakombolegwa banolondolodza zila dzangu.
33 Ihwani ndayo dzangu mu tjenjele,
musitongo dzilashilila.
34 Wakakombolegwa nthu unondihwilila,
akalinda mazhuba wose pa mikoba yangu,
akalinda pawunde ye mikoba yangu.
35 Ngobe iye wandiwana unowana butjilo,
ngono unowana ludo muna Yahwe,
36 koga iye usingandiwane unozwikubadza;
bose banondibenga banoda lufu.”
© Kalanga Bible © Bible Society of Botswana, 2008, 2018.