Mambo banobokela Ndzimu kukunda
1 Ngakukudziwe Yahwe, shongwe yangu,
ibo banodiya maboko angu kugwa,
ne zwinyala zwangu kugwa ngwa,
2 Shongwe yangu kakale mbakililo yangu,
mbako yangu yakasima kakale ntjidzi wangu,
tjivikili tjangu, mubali ndowana dizhilo,
imwi munothama kuti bathu babe pasi kwangu.
3 Imwi Yahwe, nthu ini kwamungabe ne hanya naye,
kene nthu we nyama ne lopa ini,
wamungashwa munkumbula kene?
4 Nthu unonga phepo
mazhuba awe anonga ntutshi unopinda.
5 Webani zhuzhugwi kwenyu Yahwe,
ngono mudelukile pasi,
kuthani matombo kuti athungayile bhulubusi.
6 Penyesani lupenyo gubapaladze,
tumidzilani misebe yenyu mubatate.
7 Tambunudzani luboko gwenyu kudwa pezhugwi,
munditjidze mundiangule mu vula dzina masimba,
mu maboko e bataya,
8 be milomo inoleba manyepkhwa,
ne maboko abo e luji aana malebeswa.
9 Ndowomumbila lumbo gutshwa, imwi Ndzimu
ndowomulidzila dende le misungo ili gumi,
10 Imwi munopa bomambo kukunda.
Imwi munogwila nlanda wenyu Dafite.
11 Mundigwile mu thumo lisina ngoni,
kakale mundiangule mu maboko e bataya,
be milomo inoleba manyepkhwa,
kakale maboko abo e luji aana malebeswa.
12 Dzene bakololo bedu mu butjetjana gwabo
banganga miti yakakula kwakapelela.
Bakololokadzi bedu bange phanda dze ndzibo,
dzakatemegwa mbako ye ng'umba ye bushe.
13 Dzene matula edu angazhala,
azhadziwe nge zwilimwa zwakasiyasiyana,
dzene pkhwizi dzedu dzingazwala dzikabe zwiwulu,
dzikabe makumi e zwiwulu mu mafulo edu,
14 dzene mangabe angasima kakweba ntolo unolema,
kuti kusitongobe ne ungathukila kene unotapiwa,
ngakusibe ne tjililo tje kuhwa zogwadza mu mikoto yedu!
15 Kwakashatha ibabo
bathu banokombolegwa kwakajalo.
Kwakashatha bathu banotola
Yahwe bali Ndzimu wabo!
© Kalanga Bible © Bible Society of Botswana, 2008, 2018.