Ntembezelo we nthu usina nlandu
1 Ihwani kukumbila kwakatambunuka Yahwe,
teedzani tjililo tjangu, hwililani ntembezelo
unodwa mu nlomo usina bupitipiti.
2 Kusheta nlandu kwangu ngakulakidziwe ndimwi,
mesho enyu ngaabone tjakalulwama.
3 Ha mungashola moyo wangu,
ha mungandikumba busiku,
ha mungandilika,
mowowana kusina bubi mundili,
nlomo wangu awutotjuluka nlayo.
4 Ngekwe mishingo ye bathu,
nge dama lenyu ndakaleya zila dze bakukutu.
5 Makumbo angu anolambila mu zila yenyu,
andithu atongopambuka muili.
6 Ndodana imwi Ndzimu ngoti imwi mowondidabila,
munditeedze, muhwe matama angu.
7 Lakidzani ludo gwenyu gunotjenamisa,
Imwi ntjidzi wa ibabo banoshaka dizhilo,
betizha zwita zwabo.
8 Munditjengete se shanga ye zhisho;
mundisumbike mu ntutshi we mapapilo enyu,
9 mundisumbikile babi banondigwisa,
zwita zwangu zwisingatje kubulaya zwandipoteleka.
10 Banokukutadza mimoyo yabo kuti basibe ne ngoni;
Milomo yabo inolebeleka nge kuzwikudza.
11 Banondilonda, bakandipoteleka sangwenu;
banoshaka sekwa bangandiligila pasi.
12 Banonga shumba inoshaka kuzandabula tjainobhata,
se shumbana ilelile mu ishakana.
13 Milikani Yahwe, igwani ne zwita zwangu muzwikunde.
Mundiangule nge thumo mu babi.
14 Yahwe mundiangule mu bathu be shango ino,
mbhailo wabo i shango ino.
Mubalobe nge shamu yamakababiganyidzila,
bana babo bawane inopinda tjilizanyo,
basiyile bana babo.
15 Koga imi nge kwangu, ndowobona tjiso tjenyu mu ndulamo;
Ndowoti ndimuka ndowoshathila kuti muyapo.
© Kalanga Bible © Bible Society of Botswana, 2008, 2018.