Sumikilisiwa kwe batjengedzi
1 Ini uzwikudza, iwe wakasima.
Uzwikudzila salulwama
zhuba lose,
2 unoshwa ualakana tjinya
lulimi gugo gonga reza inopitsha,
bhitipiti ndiwe.
3 Unoda bubi kupinda ndulamo;
kakale unoda manyepkhwa kupinda malebeswa.
4 Unoda matama wose e kutjinya,
iwe lulimi gwe ntjengedzi!
5 Koga Ndzimu unowokukolomola nge kusingapele;
unowokudzamula ukakulashila kuzhe kwe nshasha uwo
unowokudzikunula mu shango ye batjili.
6 Balulwami banowobona, bakatja, ngono
banowoseka nshingi we bubi, beti,
7 “Bonani iye iwoyu usingake katizhila mu Ndzimu,
koga wakagalabgwe mu fumwa njinji,
kathama fumwa ikabe dizhilo lile!”
8 Koga imi ndonga ntoba mu ng'umba ye Ndzimu.
Ndogalabgwe mu ludo gwe Ndzimu gusingazunguzike
nge kusingapele kose.
9 Ndowomuboka nge kusingapele,
ngekwe tjamathama.
Ndowoleba ngekwe zina lenyu pana ibabo
banogalabgwe mu muli, ngobe zina lenyu lakalulwama.
© Kalanga Bible © Bible Society of Botswana, 2008, 2018.