Ntembezelo wekukumbila simba lekukunda
1 Ndzimu, makatilasha, mukatifupatila,
makabe makagwadzamoyo ngatitjibgwililanani!
2 Makathama kuti shango itengenyeke;
makaipalula ikazhuka;
lulwamisani mikhwe imu shango, ngobe inozunguzika.
3 Makathama kuti bathu benyu badziyidziwe
nge zwithu zwinjinji zwakasima;
makatipa nkumbi kuti ting'we,
nkumbi iwoyo wakatidzungula.
4 Makabigila banomutja tjilakidzo,
kuti batizhile kuguli mathumo anodwa mu dati.
5 Thamani kuti tikunde nge luboko gwenyu,
kakale mutidabile,
kuti ndizo ibabo bamunoda batjidziwe.
6 Ndzimu wakalebeleka mu bugalo
gwawo gwakayengemala eti,
“Nge shatho ye kunda kwangu,
ndowothubukanya Shekemu,
kakale ndowokobanya nkuku we Sukoti.
7 Giliyadi nde yangu na Manase nde yangu;
Ifureimi i hwutshe ye tjivikili tje nsholo wangu,
Juda i swimbo yangu ye bushe.
8 Moabu i bhavu landinongulila;
Edomu iye ndomposa nge shangu yangu;
ndomimilila Filisitiya ngobe ndankunda.”
9 Ndiyani unowondiyisa ku nzi nkulu wakabakiligwa nge luswingo?
Ndiyani unowonditungamila ndiyenda ku Edomu.
10 Apa amuzotilasha kene Ndzimu?
Amutoyenda ne babhayani bedu Ndzimu.
11 Mutibhatshe mu zwita,
ngobe bhatsho ye nthu ayina nshingo.
12 Ndzimu unowotipa tjilopa
ndiwo unowotshamba zwita zwedu nge makumbo.
© Kalanga Bible © Bible Society of Botswana, 2008, 2018.