Matama e kutanga
1 Eyi i zumbunulo ya Jesu Kirisiti yaakapiwa nge Ndzimu kulakidza balanda bawo tjinowoshingikala tjinyolotjo. Jesu kaizibisa nge kutuma ntumwa uwe we kudzimu kuyizibisa nlanda uwe Johani. 2 Johani kapa butendeki ngekwe dama le Ndzimu negwe tjakashingwa ndi Jesu Kirisiti, kaleba tjimwe ne tjimwe tjaakabona. 3 Wakakombolegwa nge unobalila pezhugwi matama e bulebesambeli igogu ne banohwa matama iyawo bakakombolegwa ne banolondolodza tjakakwagwa muguli ngobe tjibaka tjasedzela.
Dumiliso ku makubungano ali kutendeka
4 Ndimi Johani, ndokwalila makubungano ali kutendeka mu ntuthu we Ezhiya:
Ngoni ngadzibe namwi ne kunyalala kunodwa ku Ndzimu iwo wakabepo, nangwenu uyapo, kakale utjawozha, nenge kunodwa ku meya ili kutendeka imbeli kwe tjigalo tje bushe gwe Ndzimu, 5 ne kuna Jesu Kirisiti iye ntendeki unogalikabgwe, mbano muna bakamusiwa mu bafi, kakale ali mbusi wa bomambo be shango.
Kunli iye unotida, kakale akatisunungula mu zwibi zwedu nge malopa awe, 6 katithama kuti tibe bushe ne bapirisiti be Ndzimu uwe, ibo tate babe. Kuna Jesu Kirisiti ngakube ne gudzo nenge simba nge kusingapele kose. Ngakujalo.
7 Bonani, unozha nge makole, ngono mesho wose anowombona, kose na ibabo bakambhaya ne njudzi dzose dze shango dzowolila nge kukwe. Ngakujalo.
8 “Ndimi bhalule kakale bhelelo,” kolebeleka She Ndzimu, iwo uyapo, kakale wakabe yapo, kakale utjawozha, iwo Masimbawose.
Mbono ya Johani ebona Kirisiti
9 Ndimi Johani ikamu tjenyu, imi ndakashanganyila namwi muna Jesu kudziyidziwa nenge bushe ne moyonlefu mu kudzikitadza, ndakabe ndili mu tjigwizi tje Patimosi ngekwe dama le Ndzimu nenge butendeki gwa Jesu. 10 Ndakabe mu Meya nge zhuba la She, ngono ahwa hwi gulu linonga nsindo we lunyanga gunolidziwa shule kwangu, 11 liti, “Kwala mu lukwalo tjaunobona, ngono ugutumilile ku makubungano ali kutendeka, mu nzi we Efeso newe Simirina newe Pegamo newe Tiyatira newe Sadisi newe Filadelifiya newe Laodikeya.”
12 Ipapo atendebuka alinga shule kuti ndibone unolebeleka nami, ngono abona zwigadziko zwe mavone ali kutendeka zwakathamiwa nge golide, 13 ngono pakati kwazo kwakabe kuna mmwe unonga Nkololo we Nthu, akaambala hazu ndefu, akazwisunga pa ifuba nge mwandabula we golide. 14 Nsholo uwe ne mavudzi awe akabe ali matjena se lungudze, ali matjena enga makaa e vula, ngono mesho awe enga nthuto we moto, 15 makumbo awe epenya se phangula yakapholitjiwa, yakapisiwa mu vutho ikakuyungiwa, ngono hwi lile lakabe linga nsindo we vula njinji. 16 Wakabe akabhata nyenyedzi dzili kutendeka mu luboko gugwe gwe luji, ngono mu nlomo uwe kukabhuda bukanu gunopitsha guna mahali mabili. Buso gugwe gwakabe gupenya se zhuba linopenya nge masimba wose. 17 Ndakati ndimbona awila pasi mbeli kwe makumbo awe ndinga ndafa, wakabiga luboko gugwe gwe luji pezhugwi kwangu, ebe eti, “Usitje, ndimi we kutanga kakale we bupelo. 18 Ndimi unotjila, ndakabe ndafa, ngono bona ndotjila nge kusingapele kose. Ndina simba pezhugwi kwe lufu ne bugalo gwe bafi. 19 Ndizo kwala zwithu zwaunobona, zwithu zose zwiyapo sangwenu ne zwithu zwinowoshingikala shule kwa ipapa. 20 Akuli ngekwe masazibgwe e nyenyedzi dzili kutendeka dzawabona mu luboko gwangu gwe luji ne zwigadziko zwe mavone zwe golide zwili kutendeka, nyenyedzi idzedzi dzili kutendeka batumwa be kudzimu mu makubungano ali kutendeka. Zwigadziko zwe mavone zwe golide zwili kutendeka makubungano ali kutendeka.”
© Kalanga Bible © Bible Society of Botswana, 2008, 2018.