1 Zwikamu, kuyemula kwe moyo wangu ne ntembezelo wangu ku Ndzimu hwuti Baiziraela batjidziwe. 2 Ndopa butendeki ngekwabo kuti banoshingayilila Ndzimu, koga kushingayila kwabo akuna luzibo. 3 Nge kushaya luzibo ngekwe ndulamo inodwa mu Ndzimu, ne kushaka kuzwithamila kwabo, abazozwipa mu ndulamo ye Ndzimu. 4 Ngobe Kirisiti ndiye bhelelo le nlayo, kuti mmwe ne mmwe unakugalamoyo alulwamisiwe.
Jidzo nge la bose
5 Mushe wakakwala eti, “Iye unolondolodza ndulamo inolebgwa nge nlayo unowotjila ndiyo.” 6 Koga ndulamo yakatemelela mu kugalamoyo ikati, “Usitongo zwibhuzwa mu moyo uti ndiani, unowotathila kudzimu?” Kodwa kuti kudelusila Kirisiti pasi. 7 Kene “Ndiani unowodelukila mu gomba?” Kodwa kumusa Kirisiti mu bafi. 8 Koga dama le Ndzimu likatini kene? “Dama lipejo nawe, limu nlomo ne mu moyo uwo.” Ndilo dama le kugalamoyo, latinosumikila. 9 Ngekuti ha uleba nge nlomo uwo uti Jesu ndi She uduma mu moyo uwo kuti Ndzimu wakammusa mu bafi, unowotjidziwa. 10 Ngekuti nthu unoduma nge moyo uwe, ndizo kalulwamisiwa, kaleba nge nlomo uwe, katjidziwa. 11 Hwalo dzoti, “Akuna iye unogalamoyo munli unowobhatisiwa shoni.” 12 Akuna kuthubukana pakati kwe Njuta ne N'giriki, ngobe She iyezwe ndiye She wa bose, ngono unokombolela bose banon'dana. 13 Ngekuti, “Mmwe ne mmwe unodana zina la She unowotjidziwa.”
14 Koga bathu bangan'dana tjini iye wabasakagalamoyo? Ngono bangagalamoyo tjini muna wabasakahwa nge kukwe? Kakale banowohwa tjini kusina nsumikili. 15 Ngono bathu banowosumikila tjini basatumwa? Sekwa kwakakwagwa kuyi “Kwakanaka seni ha basumikili be zhisa ndebo mbuya!” 16 Koga ate bose bakaamutjila ndebo mbuya. Isaya wakati, “She, ndiani wakagalamoyo tjaakahwa naswi?” 17 Ndizo wali, kugalamoyo kodwa muna tjawahwa, tjawahwa tjodwa mukusumikigwa kwa Kirisiti.
18 Koga ndobhuzwa nditi: Apa abazohwa kene? Tjose bakahwa!
“Mahwi e basumikili akazhala shango yose,
matama abo kaswika ku phelelo dze shango.” 19 Ndobhuzwa kakale nditi: Apa bathu be Iziraela abazohwisisa kene? Mushe kutanga wakati,
“Ndowokuthama kuti uthamile fupa basi itjaba,
kuti ndizo mube ne fupa
nge itjaba tjisakatjenjela
ndowokugwadzisamoyo.” 20 Ngono Isaya unoleba akasima eti,
“Ndakawang'wa ndi ibabo bakabe basingandishake,
ndakazwilakidza kuna ibabo bakabe basingabhuzwe nge kwangu.” 21 Koga ngekwe Iziraela kati,
“Zhuba lose ndakatjinga nge maboko angu,
nditjingila bathu basingahwe kakale banonyanyayidza.”
© Kalanga Bible © Bible Society of Botswana, 2008, 2018.