Yahwe baswika kakale banobusa
1 Bonani, zhuba la Yahwe lasendela lekuti thundu iyo yatapiwa ikobanyiwe pakati kuko. 2 Ndowokubunganyila zwitjaba zose ku Jerusalema kuti bagwe nayo ngono nzi nkulu unowotapiwa ne thundu dze ng'umba dzowotapiwa ne bakadzi banowodzugwa, gwamu le nzi nkulu lowotapiwa koga basala abatowotogwa mu nzi nkulu.
3 Ipapo Yahwe banowomilika bakanogwa ne zwitjaba koga sekwa bakagwa mu zhuba le ngwa. 4 Mu zhuba ilelo makumbo abo anowobe alimile mu Dombo le Mitoba kunobhuda zhuba kwe Jerusalema ngono Dombo le Mitoba lowophatukana na pakati kukabe ne kunobhuda zhuba kwalo ne kunomila zhuba kwalo pakati kukabe ne nkuku nkulu, kube ne gwamu limwe le dombo liyendila ku burwa limwe liyendila ku bunandzwa. 5 Mowotizha ne nkuku we dombo langu ngoti nkuku unonoswika ku Azele sekwa makatizha tjibaka tje kutenganyika kwe shango mu misi ya Uziya mambo we Juda. Ipapo Yahwe Ndzimu wangu banowozha ne bayengemali babo bose.
6 Mu zhuba ilelo akutowobe ne tjedza, akutowobe ne kupota kene kapuku. 7 Kowobe kuli zhuba lisingafanane ne mamwe mazhuba kowobe kuli zhuba lisina masikati kene busiku, zhuba linozibgwa na Yahwe. Ha madekwana ezha kowobe tjedza.
8 Mu zhuba ilelo vula inotjila inowowunga idwa mu Jerusalema, gwamu limwe liwungila ku gungwa le kunobhuda zhuba limwe lowowungila ku gungwa le kunomila zhuba, mu tjilimo ne mu mbaba. 9 Yahwe banowobe mambo be shango yose. Mu zhuba ilelo kowobe na Yahwe nng'ompela ne zina labo lowobe lili ilo koga.
10 Shango yose kudwa mu Geba kunoti Rimoni ku burwa gwe Jerusalema kowonga Arabha. Koga Jerusalema inowomilidzigwa pezhugwi ikasala ili mu magalo ayo kudwa ku Nkoba we Bhenjamini kuyendila ku Nkoba we kutanga ku Nkoba we ku ndzibo ne kudwa ku thungamakole ye Hananeli kunoti kunoswing'wa nkumbi we zhambi wa mambo. 11 Jerusalema inowogaligwa tjatjose, aitjowofa yakolomogwa kakale, Jerusalema inowobakililika.
12 Etji nditjo tjiga Yahwe tjabanowoshingisa kubulaya zwitjaba zwinogwa ne Jerusalema. Nyama ye mibili yabo inowobola balimile, mesho abo anowobola ne ndimi dzabo dzowobolela mu milomo yabo. 13 Mu zhuba ilelo Yahwe banowoloba bathu nge lutjo bukulu. Nthu mmwe ne mmwe unowobhata mmwe nge maboko bakamukilana. 14 Juda bo inowogwa ne Jerusalema. Fumwa ye zwitjaba zwakapoteleka inowotogwa, golide ne siliva ne zwiambalo zwinjinji. 15 Tjiga tjinonga itjetji tjowobulaya mbizi ne mowulo ne dzikamela ne madonki ne zwithuwo zose zwimu makotokelo.
16 Ipapo bakatjila kudwa mu zwitjaba zwabe zwigwa ne Jerusalema zowogala zwiyenda gole ne gole zwinonamata Mambo Yahwe Masimbawose ne kuzana Nzano we Mishasha. 17 Ha kungabe ne mmwe we bathu mu shango usingayende ku Jerusalema kunonamata Mambo, Yahwe Masimbawose, akutowobe ne vula inona. 18 Ha bathu be Baegipiti basinganonamata akutowobe ne vula inona. Yahwe banowobazhisila tjiga tjabanolonga mu bathu basingazane Nzano we Mishasha. 19 Eyi ndiyo shamu inowolobgwa Egipiti ne shamu ye zwitjaba zose zwisinga yende kunozana Nzano we Mishasha.
20 Mu zhuba ilelo, “Kwakayengemala kuna Yahwe” kowobe kwakakwagwa mu tiloko dze mbizi ne hali dzimu Ng'umba ya Yahwe dzowonga zwikutili zwakayengemala zwi mbeli kwe tjibeso tjinopisigwa zwibhayilo. 21 Hali imwe ne imwe mu Jerusalema ne Juda inowoyengemala kuna Yahwe Masimbawose naibabo banozha kuthama zwibhayilo banowotola dzimwe hali bakabhika nadzo. Ngono mu zhuba ilelo akutjowobe ne N'kanana mu ng'umba ya Yahwe Masimbawose.
© Kalanga Bible © Bible Society of Botswana, 2008, 2018.