1 “Apa nthu aana nshingo wakasima mu shango kene?
Apa mazhuba awe aatonga e nshingi wakatapiwa kene?
2 Se nlanda unoyemula mitutshi ye madekwana,
se nthu wakatapiwa wakalindila ndipo iye ye zhuba,
3 ndizo ndapiwa mimwedzi ye suli,
masiku e buyendasi ndakaapiwa.
4 Andiizela ndozwibhuzwa nditi, ‘Ndowomuka lini?’
Koga busiku bulefu, ndolala ndipitukana kudzina kuyedza.
5 Mbili wangu wakaambadziwa nge hwonyana ne shambgwa,
ganda langu lowomelela, likakwanganyuka.
6 Mazhuba angu anopinda elibilidza kupinda thali imu nnali,
anopela koga kusina kugalabgwe.
7 “Kumbulani, kuti butjilo gwangu i phepo koga,
mesho angu aatjowofa abona tjakanaka kakale.
8 Zhisho le unondibona alitjowondibona kakale,
mowondishaka koga ndowobe ndisitjipo.
9 Se gole linopaladza likasitjabong'we
kwakajalo, nthu unongina mu gomba le lufu aatjabuya.
10 Aatjowofa abgwilila ku ng'umba iye kakale,
ne bugalo gugwe agutjowofa gwan'ziba.
11 “Nenguba kwakajalo andingazhalile nlomo wangu!
Ndowolebeleka koga nenguba meya yangu ili mu buyendasi.
Ndowong'ong'ola koga ndili mu kugwadzika.
12 Apa ndi gungwa kene bhukanana le gungwa kene?
Kwamungadzina mukandilisa kene?
13 Ha nditi bulawo gwangu gowondinyaladza,
bulalo gwangu gowobhatsha kutapudza ng'ong'ola kwangu,
14 ipapo monditjisa nge mawoloto,
mukandipalusa moyo nge mibono,
15 kwandinowana ndishalula kusiniwa,
pa kutjila ndili mafupa koga.
16 Ndoshima butjilo gwangu, aanditowotjilila tjose.
Mundiletje, ngoti butjilo gwangu i phepo koga!
17 Apa nthu uni, kwamunga ntolela pezhugwi kene,
kakale wamungashwa muna hanya nge kukwe kene?
18 Wamungashwa mushola mangwanana mamwe ne mamwe kene?
Wamungashwa mulika tjibaka ne tjibaka kene?
19 Apa kowotola tjibaka tjingapani kudusa mesho enyu mundili,
kene kundipa tjibaka tje fema kene?
20 Apa ha ndatjinya ndinga thamani kumuli imwe nlindi we bathu?
Ini mandithama panobhaya nsebe wenyu kene?
Ini ndabe ntolo mu muli kene?
21 Ini musingandizwiibhatigwe milandu yangu kene?
Ini musingaduse kutjena jinyo langu kene?
Ngoti tjinyolotjo ndowobe ndabe mu gomba ndafa,
ngono mowondishaka mukasindibone.”
© Kalanga Bible © Bible Society of Botswana, 2008, 2018.