Ndzimu ne bathu bawo
(1 Zwiyitikalo 16:8-22)1 Tendani Yahwe, danani zina labo,
thamani kuti mishingo yabo izibike mu bathu.
2 Mubambile, imbani njimbo dzinobakudza,
lebani ngekwe mishingo yabo yose inotjenamisa.
3 Gudzo mu zina labo lakayengemala.
Mimoyo ya ibabo banoshaka Yahwe ngaishathe.
4 Shakani Yahwe nenge simba labo,
dwililani mushake buso gwabo.
5 Kumbulani mishingo inotjenamisa yabakathama,
matjenamiso abo, nenge kusumikilisa kwabakathama.
6 Imwi lutshinga gwa Abhurahama nlanda wabo,
bakololo ba Jakubo, bashalugwa babo.
7 Ndibo Yahwe Ndzimu wedu,
kusumikilisa kwabo kumu shango yose.
8 Banokumbulukigwa tjidumano tjabo nge kusingapele,
ngekwe dama labakadwa, zwizekugwana zwili tjiwulu.
9 Tjidumano tjabakathama na Abhurahama,
kutuna kwabo begadzabgwe Isaki,
10 kwabakatshambilidza muna Jakubo se nlayo,
muna Iziraela tjili tjidumano nge kusingapele,
11 beti, “Ndowomupa shango ye Kanana
se gobe lenyu kube lukata.”
12 Pabakabe basibangana nge mbalo,
bali bashomanana, kakale bali bazhi muili,
13 beyenda kudwa mu tjaba imwe benoti ku imwe,
bedwa mu mbuso mmwe benoti ku mmwe,
14 akuna wabakadumilila kuti abatshambilidze,
bakatjemela bomambo mu bumo gwabo,
15 beti, “Musitongo kuma bazhodziwa bangu,
musitongogwadzisa balebesambeli bangu.”
16 Bakati bezhisa bhamba mu shango
bakapedza zojiwa zose,
17 bakabe batungamidza nlume mbeli kwabo,
Josefa, wakabe atengesiwa ali nlanda.
18 Makumbo awe akahwisiwa zogwadza nge miketani,
ntshibha uwe wakapombedziwa tshipi,
19 kuswikila tjaakaleba tjishingikala,
dama la Yahwe lakanlika.
20 Mambo wakalaila kuti asunungugwe,
nlauli we itjaba wakansunungula.
21 Wakanthama she we ng'umba iye,
ne nlauli we thundu iye yose,
22 kuti ape ndaulo hadzasha dzawo se kwaanoda
kakale kuti adiye batungamili babe butjenjedu.
23 Ndizo Iziraela akazha mu Egipiti,
Jakubo wakagala se nzhi mu shango ya Hamu.
24 Ngono Yahwe bakawatsha bathu babo kwazo,
kakale bakabasimisa kupinda zwita zwabo,
25 bakashandula mimoyo yabo kuti babenge bathu babo,
kuti bashinge ne balanda babo nge bupitipiti.
26 Bakatuma nlanda wabo Mushe,
na Aroni ibo babakashalula.
27 Bakathama zwilakidzo zwabo pakati kwabo,
ne matjenamiso mu shango ya Hamu.
28 Bakatuma zhalima, bakathama kuti shango iti zwii,
bakashandukila matama abo
29 bakashandula vula dzabo dzikabe malopa,
bakathama kuti hwobe dzabo dzife.
30 Shango yabo ikazhala mazhula,
nenge mu ng'umba dza bomambo babo.
31 Bakalebeleka, kukazha nlunda we thuzi,
ne nyunyu dzikazhala mu shango yabo yose.
32 Bakabaligila tjivulamabgwe mu bumo gwe vula,
ne lupenyo gwe vula gukapenya mu shango yabo yose.
33 Bakaloba mizhambi ne mipaya yabo,
ngono bakavunilila miti ye shango yabo.
34 Bakalebeleka, phashu dzikazha
ne phashwana dze bunji gusingabalike,
35 dzakaja zwimela zose mu shango yabo.
36 Bakabulaya mbano dzose mu shango yabo,
zwizwalo zwe kutanga zwe simba labo lose.
37 Ndizo kapeleka Baiziraela bakasenga siliva ne golide,
akuna ne nng'ompela mu ludzi gugwe wakakuthiwa.
38 Baiziraela bakati bemilika Egipiti ikashatha,
ngobe bakabe bobatja.
39 Bakatambunudza gole kubafukidza,
ne moto kuti kube ne tjedza busiku.
40 Bakakumbila, ngono bakabazhisila hwalishanga,
bakabapa zojiwa zwinodwa kudzimu zwili zwinjinji.
41 Bakazhula shongwe vula ikatebukana,
ikawunga ipalama tjilambanyika se gwizi,
42 ngobe bakakumbulukigwa kugadzabgwe kwabo kwakayengemala,
ne nlanda wabo Abhurahama.
43 Ndizo bakapeleka bathu babo ngekushatha,
bashalugwa babo bemba.
44 Bakabapa shango dze zwitjaba,
ngono bakazwitolegwa fumwa yakazwishabigwa nge zwitjaba,
45 kuti ndizo kubupelo babhate milayo yabo
ne kutjengeta ndaulo dzabo.
Kudzani Yahwe!
© Kalanga Bible © Bible Society of Botswana, 2008, 2018.